Eklipsea ikusteko eremuen trafikoa kontrolatuko dute asteazkenean
Udaltzaingoak Higer itsasargiaren ingurua kontrolatuko du, eta Ertzaintzak Jaizkibelgoa. Eremuak autoz betetzerakoan, ezingo da pasa.
Denon ahoan dago eklipsea. Badirudi jende askok kanpora joateko intentzioa duela, eklipsea osotasunean ikusten den tokietara, baina Hondarribian eta inguruetan %99,70eko eklipsea emango da. Asteazkenean emango da, eta jendearen grina ikusita, Hondarribiko Udalak aktuazio berezia egin beharko du Higer itsasargiko eremua ongi zaintzeko. Udaltzaingoak bertan izango dira arratsaldean, eta eremua autoz betetzerakoan, ez dute bertan auto gehiago sartzen utziko.
Herritarrei eklipsea ikustera oinez joatera animatu die udalak. Baina jakinda jende asko autoan mugituko dela, 16:00etatik aurrera udaltzaingoek eremuko joan etorriak kontrolatuko dituzte. “Behin eremua autoz betetzen denean, udaltzainek trafikoa eten egingo dute. Une horretatik aurrera, egoiliarrei bakarrik baimenduko zaie ibilgailuz igotzea”, adierazi du udalak.
Itsasargiaren eremua Udaltzaingoaren esku geratuko da, baina Jaizkibelgoa, Ertzaintzak kudeatuko du. “19:30ak inguruan hasiko da fenomeno astronomikoa, une gorena 20:27 eta 20:36 artean izango da eta 21:20eak ingururako guztia amaituta egongo da”, iragarri du udalak.
Surik ez
Era berean, gaur egun dagoen egoera klimatiko idorrak bultzatuta, udalak oroitarazi du debekatua dagoela sua egitea. Ingurumena zaintzearen alde ere, mendia zaborrez garbi mantentzearen garrantzia nabarmendu dute, jakinda jende asko ibiliko dela bertan asteazkenean.
