Huecco, Jimena Amarillo, Biznaga eta beste sei talde ariko dira aurtengo Irun Zuzenean jaialdian
Urriko larunbatetan musika izango da protagonista nagusia; kontzertuak CBAn eta San Juan plazan izango dira, sarrerak dagoeneko salgai daude.
Bederatzi edizio pasa dira Irun Zuzenean musika jaialdia lehen aldiz egin zutenetik. Urteotan, maila handiko eta ibilbide luzeko musika talde ugari pasa dira CBAko Irun Zuzenean aretotik. Gaur, hilak 7, aurtengo edizioa aurkeztu dute, eta bederatzi kontzertuen xehetasun guztiak eman dituzte. Urriko larunbatetan honako talde hauek izango dira hirian: Huecco, Jimena Amarillo, Biznaga, Pipiola, Carlos Sadness, La Paloma, La Habitacion Roja, Garazi Esnaola eta Amaia Miranda. Dagoeneko salgai daude kontzertuerako sarrerak udal webgunean.
Beste urte batez, ibilbide luzea duten artistak eta hasi berriak direnak elkartuko ditu jaialdiak. Kontzertuak CBAko Irun Zuzenean aretoan izango dira, hori baita jaialdiaren egoitza nagusia. Kontzertuen kopuruari dagokionez, aurten handitu egin dutela azaldu du Nuria Alzaga Kultura ordezkariak gaur goizeko aurkezpenean. “Iaz formatua aldatu genuen, eta, horri esker, Irun Zuzenean Zikloa etapa berri batean sartu egin da, CBAko sala polibalenteak eskaintzen dituen aukera guztiak baliatu ahal izateko”, gehitu du.
Urrian, larunbatero kontzertuak izango dira, 21:00etan hasita. Eszenatokira igotzen lehena Huecco izango da. Urriaren 3an, doako kontzertua eskainiko du San Juan plaza. Ivan Sevillanok plaza hankaz gora jarriko du rock-a, rumba, reggae-a, ska, erritmo latinoak eta musika mestizoa nahastuz. Urriaren 10ean, gazteen txanda helduko da. GazteARTEan programaren eskutik, Biznagak eta Jimena Amarillok CBAko aretoa jendez beteko dute. Punk rocka, indie, musika elektronikoa eta pop garaikidea entzuteko aukera izango dute bertaratzen direnek.
Urriko hirugarren larunbatean, hilak 17, beste bi kontzertu izango dira CBAn: Pipiolas eta Carlos Sadness. Lehenengo bikoteak musika independientearen erreferenteetako bat da, eta indie popa, dream popa eta musika elektronikoa nahasten ditu. Carlos Sadnessek, berriz, musika goxoagoa du eta publikoa hunkitzera etorriko da popa, folka eta elektronika oinarri izanik. 24an, La Paloma eta La Habitacion Roja ibilbide luzeko taldeen txanda izango da. 90. hamarkadarako bidaia egingo dute euren musikaren bitartez, gitarra gaueko protagonista nagusia izango da. Azkenik, urriaren 31n, Garazi Esnaolaren eta Amaia Mirandaren kontzertuek amaiera emango diote aurtengo jaialdiari. Bi artista hauek euskal artisten belaunaldi berriaren parte dira eta euren letren bitartez, proposamen berritzaileak, gertukoak eta modernoak eskainiko dituzte.
Berritasun gisa, aurten kontzertu guztietara joateko bonuak salduko dituzte. Txartela orokorrak 40 euroko prezioa izango du; hoberidunek 30 euroan eskuratu dezakete. Kontzertu guztien sarrerak eta prezioak udal webgunean kontsulta daitezke.
