Garagardo artisauen azoka, eskaintza anitzarekin
Aurten Gernikako Arbolan egingo dute garagardo azoka, bihar, eta janarekin eta edanarekin batera, hainbat gauza antolatu dituzte.
Urte hasierarekin utzi zuen Higer Beer garagardo markak haien edariak egiteari. Egun haietan, HITZAk elkarrizketa egin zien, eta argi azaldu zuten garagardoaren inguruan mugitzen jarraituko zutela, hala nola, garagardo azoka eginez. Hori bera da bihar egingo dutena: Hondarribiko Garagardo Artisau Azoka. Hirugarren aldiz egingo dute, eta aurten, Higer Beerreko edariak egon ez arren, bertan izango dira kideak. Aparra elkarteak antolatzen du azoka, eta hainbat postu izango dira. Garagardoaz gain, beste hainbat gauza prestatu dituzte. Aurten, Gernikako Arbolan egingo dute.
Azoka 12:00etan hasiko da. Bederatzi garagardo postu izango dira bertan. Euskal Herritik sei: Versum, Basabe, Brewery land, Meta, Scimmia eta Atala. Kataluniatik bi etorriko dira, Refu eta La Salvatge. Azkenik, Kantabriatik ere Redneck izango da. Baina edaria ez ezik, jatekoa ere eskainiko dute. Hiru postu izango dira: La Visionaria gazta dena, Doña Chepina janari mexikarrak eta Peccato pizzeria.
Eguerdian, aurreko urteetan egin izan duten bezala, harri jasotzaileek haien balioa erakutsiko dute, erakustaldi bat eginez. Udane Ostolaza eta Jon Unanue Goenatxo III izango dira kirolariak. Ondoren, arratsaldean, txinga probak ere egingo dituzte, bertaratutako jendearekin, baina kasu horretan, aldaketa batekin. Txingak beharrean, garagardo kupelak erabiliko dituzte.
Dantzatzeko gogoa
Musikak hartuko du arratsaldea. Lehenik, Zker Band Elektrotxarangak girotuko du Gernikako Arbola, 19:00etatik 21:00etara. Ondoren, Onavibe taldearen txanda izango da, eta azkenik, El Conde Orloc DJak itxiko du eguna.
Azokarekin batera, aurreko urteetan egin den moduan, Tomate Txapelketa egingo da. Hondarribitarrek haien baratzeetako tomateak eraman ditzakete, eta herriko jendeak eta sukaldariek probatuko dituzte, ondoren, onena zein den erabakitzeko.
