Ioseba Amunarriz, Kofradia edo Izugarria Konpartsa, batek jasoko du Urrezko Intsignia
Irailaren 7an ematen den Urrezko Intsignia nork jasoko duen jakiteko momentua geroz eta gertuago dago. Herritarren proposamenak jaso ondoren, hiru izenen artean dago aukeraketa.
Urtero Hondarribiko Udalak herriko pertsona, kolektibo edo elkarte bati ematen dio Urrezko Intsignia, jaietako programaren parte. Alberto Lasa izan zen iazko saritua, horrela erabaki zuen eta jendeak. Aurten, herritarren proposamenak jaso ondoren, hiru izenen artean erabaki beharko da: Ioseba Amunarriz, Done Pedro Itsas Gizonen Kofraida edo Izugarria Konpartsa. Irailaren 7an ematen da intsignia, udaletxean egiten den zeremonia baten bidez.
Bihartik aurrera bozkatu ahalko dute herritarrek, udalaren web atarian edota BAZ bidez. Abuztuaren 21era arte egongo da bozketa irekia.
Hiru proposamenak
Urte osoan zehar aritzen dira Izugarria Konpartsako kideak herriko kaleak alaitzen. Erraldoiak eta buruhandiak txikientzako gauzak izan daitezkeen arren, sortzen duten xarma ez du inork lortzen. Erromatarra, balea, sardina, amona xarra, kaletarrak, arrantzaleak eta baserritarrak… denak dira jada jaietako ikur mitikoak. “Bere jardueraren bidez, Hondarribiko jai giroa eta kultura herrikoia bizirik mantentzen laguntzen du, erraldoi eta buruhandien tradizioa belaunaldiz belaunaldi transmititu eta herriaren nortasuna aberastu”, azaldu du Hondarribiko Udalak ohar bidez.
Ioseba Amunarrizek 2002. urtean hartu zuen Hondarribia Arraun Elkarteko gizonezkoen traineru nagusiko patroi izateko ardura. Harrezkeroztik, hor dabil, eta oraindik ere gogor eusten dio. 1991. urtean sartu zen Amunarriz arraun elkartean, eta bizitza erdia baino gehiago eman du bertan. Dena irabazi du Ama Guadalupekoarekin, baita ere patroi onenaren saria, hiru aldiz. “Urte luzez erakutsitako lidergoari, konpromisoari eta lan egiteko moduari esker, Hondarribiko arraunaren ikur bihurtu da, herriaren izena Euskal Herriko eta estatuko arraunaren lehen lerroan jarri baitu”, adierazi du udalak.
Done Pedro Itsas Gizonen Kofradia erregistratutako kofradia zaharrenetarikoa da. 1361. urtean sortua, Hondarribiaren, hondarribitarren eta itsasoaren arteko harremana ederki irudikatzen du. Herriko ekonomiaren sustengu handiena izan da mende askoz. Oraindik ere, bertan eusten du, geroz eta ontzi gutxiagorekin, baina herriko hainbat familiei haien sustengu ekonomikoa emanez. “Kofradiak herriaren nortasuna sendotu du: itsas tradizioa belaunaldiz belaunaldi transmititzen laguntzen du eta Hondarribia itsasoari estuki lotutako herria dela sendotzen du”, esan du udalak.
