Pasaia kaleko obren atzerapena begi onekin ikusten du EAJk
Jeltzaleek salatu dute Abotsanitzek Santiago kalean hartutako erabakiaren alderantzizkoa egin dutela orain, kontraesan batean oinarrituz.
Pasaia kaleko berrurbanizazio lanak bigarren fasean sartu dira. Baina Hondarribiko Udalak iraila erdialdera atzeratu du obraren hasiera, bertako bizilagunei uda garaian aparkalekuak ez kentzeko xedearekin. Horren aurrean, EAJk adierazi du erabaki egokia dela, baina ez dutela ulertzen zergatik Santiago kalean jeltzaleek eskaera hori egin zutenean udal gobernuak ez zuen berdina egin. Haien ustez, kontraesan argia dago udal gobernuaren jarreran.
“Pozten gaitu udal gobernuak oraingoan bizilagunei eragozpen gehiago ez sortzea erabaki izana. Erabaki zuzena dela uste dugu. Baina, hain zuzen ere, erabaki horrek erakusten du 2024an defendatu zuten planteamendua okerra izan zela eta EAJ-PNVk defendatzen zuen irizpidea zela egokiena”, adierazi dute jeltzaleek.
EAJtik adierazi dute haien ustez ezberdintasuna izan dela bi auzoen bizilagunek jasandako tratuaren artean. “Santiago kaleako eta Arrantzale auzoko bizilagunek bi uda jarraian bizi izan dituzte urbanizazio obra handiek eragindako ondorioak: kale itxiak, aparkaleku galera, zarata, hautsa eta tamaina horretako obra batekin uda garaian bizitzeak dakartzan eragozpenak. Pozten gaitu Pasaia kaleko bizilagunek egoera hori bizi beharrik ez izateak. Ulertzen zaila da, ordea, irizpide hori bera zergatik ez zitzaien aplikatu 2024an eta 2025ean Santiago Kaleako eta Arrantzale Auzoko bizilagunei”.
