Kalean margotzeko ohitura galdu ez dadin
Emekik bere 32. Kaleko Margoketa Lehiaketa antolatu zuen atzo. Xabier Arribas irundarrak irabazi zuen, Donostia kaleko bista ederrak margotuz.
Lehiaketa bat 32 aldiz egiten bada, esan daiteke arrakastatsua dela. Hori da Emeki Emakume Elkartearen Kaleko Margo Lehiaketarekin gertatzen dena. Atzo egin zuten, esan bezala 32. aldiz. 23 artistek hartu zuten parte, eta herriko hainbat txokotan banatu ziren, bertako paisaiak margotzeko xedearekin. Azkenean, Xabier Arribas irundarrak bereganatu zuen txapelketa.
Egun polita zuten atzokoa, paisaiak margotzeko aproposa. Batzuk Portua auzoan barrena jarri ziren, beste batzuk harresien inguruetan, baziren ere txoko altuak hartu zituztenak, Hendaia eta Urruña ederki ikuskatzeko. Alde Zaharra ere mihise askoren protagonista izan zen. Herri koloretsua da Hondarribia, eta hori artistentzako aproposa da, noski.
Epaimahaia ere maila altukoa izan zen, urtero bezala: Maore Sagarzazu Zurutuza (diseinatzaile grafikoa, ilustratzailea eta diziplina anitzeko artista), Lupe Amunarriz Emazabel (herriko margolaria), Javier Sagarzazu Garaicoechea (Hondarribiko margolari beteranoa eta margo lehiaketako epailea lehen ediziotik), Rakel Salinas Arbelaitz (artean lizentziatua eta arte hezitzailea) eta Itziar Basterretxea Seijo (Iiingles musika taldeko kide eta artista polifazetikoa, karakterizazioan espezializatua).
Kalitatea ez da falta
Emekikoek adierazi dutenez, herri askotatik iristen dira parte hartzaileak: “Hondarribia, Irún, Lesaka, Eibar, Ataun, Artziniega, Donosti, Zizurkil, Errenteria, Beasain, Getxo, Linxe…”. Epaimahaiak adierazi duenez kalitate handiko artelanak aurkeztu dira, eta bereziki aurten lientzo handiek izan dute protagonismoa.
Hona hemen irabazleak eta haien artelanak:
Lehenengo saria: Xabier Arribas (Irun).
Bigarren saria: Javier Igoa (Lesaka).
Hirugarren saria: Iban Aranburu (Beasain).
Accesit saria: Elsa Gonzalez (Irun).
Irabazle guztien argazkia:
