Guadalupeko "novenak", aurten lehenago
Aurten ez da bederatziurrenik izango irailaren 8an. Abuztuaren 30etik irailaren 7ra luzatuko dira Guadalupeko elizako hitzorduak
Ama Guadalupekoa Santutegira sarbidea mugatuko du udalak hilaren 31tik irailaren 8ra bitartean. Guadalupeko eliza egiten diren bederatziurrenak, novenak moduan ezagututakoak, aurten dataz aldatu dituzte. Normalean, abuztuaren 31n hasten ziren, eta azkena egun handian izan ohi zen, irailaren zortzian. Aurten, aldiz, lehenago egingo dira. 30ean hasiko dira, eta 7an amaitu. Aldaketa arrazoi logistikoengatik egin da gehien bat.
Normalki, herri askotan, egun handia baino lehen amaitzen dira horrelako ohitura liturgiko elizkoiak. Baina Hondarribian, egun handian ere egiteko ohitura mantendu izan da orain arte. Horrek baina, Alardean ateratzen diren edota bazterrean ikusten duten pertsonei oztopoak jarri dizkie urte askoz, eta beraz, beste herrietan moduan, bezperan amaituko dira bederatziurrenak. Horrez gain, adierazi dute irailak 8an egiten diren meza guztietarako apaizak aurkitzea ez dela erraza gaur egun.
Beti bezala, mezak 06:00etan eta 08:00etan izango dira, eta Portuko elizan 19:00etan. Goizekoetarako, autobusa izango da eskuragarri, doan. 06:30ean aterako da Irundik, Fermin Calbetondik, eta pixkanaka Hondarribira hurbilduko da. Hainbat geltoki izango ditu herrian: Mendelu (06:45), Amute (06:48), La Muela (06:53), Itsasargi 3 (06:55), Sabino Arana 8 parean (07:00), Alameda (07:10) eta iritsiera Guadalupen 07:30ean. jaitsiera 09:15ean egingo du.
