Sei aparkaleku berri Kattalin Erauso kalean
Motoentzako aparkalekua ere bertan jarri dute.
Duela pare bat aste ireki zituzten Presa I eraikineko aparkalekua. Osotasunean 65 plaza berri izan ziren. Orain, beste sei aparkaleku berri ezarri dituzte, oraingoan Kattalin Erauso kalean. Erabiltzen ez zen iskina batean margotu dituzte plazak. Horrez gain, motoak aparkatzeko lekua ere izango da.
Aparkalekuaren afera, orain, udan bereziki, herritarrentzako arazo handia da. Ia bere biztanleria bikoizten du Hondarribiak udaran, kanpotik datorren jendea dela eta. Presa I eraikinaren sorrerarekin, bertako aparkalekua galdu zen, ehuna autorentzako espazioa kenduz. Hondarribia ez da aparkaleku askoko hiria, eta hori udalak badaki. Horregatik, HAPOa onartzerakoan, proiektu berriak martxan jartzeko ideia mahaiaren gainean dute, hala nola Zezen Plazako lurpeko aparkalekua.
