Donostiako Klasikoa dela eta, trafiko aldaketak
Larunbat honetan, abuztuak 1, lasterketak Irungo kaleak zeharkatuko ditu, eta aldaketak izango dira 14:45etik 15:45era.
45. Donostiako Klasikoa antolatuko dute larunbat honetan, abuztuak 1, goi mailako egun bakarreko txirrindularitza lasterketa handia. Lasterketa honek Gipuzkoako hainbat eskualdetatik igaroko da. Hori dela eta, Irunen trafiko aldaketak izango dira, 14:45etik 15:45era. Tarte horretan Erdialdeko zirkulazioa guztiz eten ez dadin, Udaltzaingoak zenbait desbideratze egingo ditu. Horregatik, hiriaren sarrera zein irteera AP-8 autobidetik egitea gomendatu dute, eta hiri barneko joan etorrietarako Elizatxo hiribidea.
Trafiko aldaketek ordubete inguruko eragina izango dute, eta tarte horretan honako kale hauetan eteteak izango dira: Letxunborro hiribidean, Zubimuxuko biribilgunean, Hondarribia kalean, Geltoki kalean, Colon ibilbidean, Iparralde hiribidean, GI-636 errepidean (Iparralde hiribidearen eta Recondoren fabrikaren artean), Nafarroa hiribideko biribilgunean, Artiga ibilbidean eta Meakan. Bestalde, Mendibil, Migel de Astigar eta Jacobo Arbelaitz inguruetan kotxeen sarbidea itxita mantenduko dute lasterketa iraun bitartean.
Gainera, Hondarribia kalean, Kolon pasealekuan eta Iparralde hiribidean (Ertzaintzako biribilgunearen eta Kolon pasealekuaren artean) ezingo dute ibilgailurik aparkatuko. Aparkalekuetan ere aldaketak izango dira: Kolon pasealekukoaren kasuan, Jose Ramon Agirretxe plazako sarbidea itxita mantenduko dute eta San Juan plazako sarbidea Prudentzia Arbide kaletik egin beharko dute. Mendibilekora, berriz, ezingo da sartu.
Irunbus, aldaketak
Irunbus zerbitzuan ere trafiko aldaketek eragina izango dute, linea guztietan gainera. Zaisa eta Ospitalearen arteko L1 lineako 14:45eko eta 15:00etako autobusek irteera lekua aldatuko dute, GI-636 errepidetik aterako dira, Azken Portuko kiroldegitik Ospitalerako bidea hortik egingo dute. Litekeena da 15:00etako, 15:15eko eta 15:30eko autobus zerbitzuak bertan behera uztea, lasterketaren arabera antolatuko baitira.
L2 eta L4 lineek Fermin Calbeton kaletik Elizatxo hiribidera lekualdatuko dituzte, 15:00etatik 16:00etara. Azkenik, San Juan eta Artia lotzen dituen L3 lineak ere atzerapenak pilatuko ditu Arbestik ateratzen direnean, lasterketa Artiga ibilbidetik igaroko baita.
