Txingudi Errugbi Eskolan aritzeko izen ematea, zabalik
2012 eta 2018 artean errugbiaz gozatzeko aukera izango dute 2026-2027 denboraldian; berritasuna, 2019 eta 2020an jaiotakoentzat izango da.
2026-2027 denboraldia hasteko gutxi falta da. Irailean hasiko dute aurtengo denboraldia ehunka haur Plaiaundin. Gaur, errugbi eskolaren aurtengorako eskaintza aurkeztu dute, kirol balioak erakusteaz gain, errespetua, euskararen sustapena eta ingurumenarekiko zaintza ardatz izanik. Eskaintza 2012 eta 2018 artean jaiotako haurrentzat izango da, alegia, 10 urtez azpikoentzat, 12 urtez azpikoentzat eta 14 urtez azpikoentzat. Aurten, gainera, 2019 eta 2020 urteetan jaiotakoek jolasen bidez errugbia lantzeko aukera izango dute, Txingudi Errugbi eta San Marcial Eskaut Gia taldeek izandako akordioari esker. Dagoeneko zabalik dago izena emateko epea, Txingudi Errugbi taldearen webgunean.
Errugbi eskolan kirola ezagutarazteaz gain, balioetan oinarritutako hezkuntza eskainiko dute entrenamenduotan. 14 urtez azpikoek (2013-2014an jaiotakoek, eta 2012an jaiotako neskek) astearteetan eta ostegunetan entrenatuko dute, 17:30etik 19:00etara. Larunbat goizean, berriz, partiden txanda izango da. 12 urtez azpikoen (2015-2016) entrenamenduak ostiraletan izango dira, 18:30etik 20:00etara. Hilabetean behin, edo bitan askoz jota, partidak izango dituzte, igandeetan. Astearteetan teknifikazio saio bat egiteko aukera izango dute.
Errugbiaren hastapeneko taldea 10 urtez azpikoa izango da, eta kasu honetan, 2017-2018an jaiotakoek 12 urtez azpikoen ordutegi bera edukiko dute. Partidak ere igandeetan izango dira, hilabetean behin edo bitan. Errugbia bere horretan landu gabe, psikomotrizitate jolasen bidez kirolaren oinarriak landuko dituzte ostiralero, 18:30etik 20:00etara.
