Emaitza onak eta errekorrak Espainiako Txapelketan
Asteburu honetan, Super Amara BAT taldeko atletak Malagan izan dira, bost atletek eta errelebo taldeak Espainiako zortzi onenen artean amaitu dute.
Asteburu honetan, Maila Absolutuko Espainiako Txapelketa jokatu dute Malagan, bertan, Super Amara BAT taldeko 15 atleta izan dira. Hiru eguneko jarduna eduki dute, eta orokorrean maila onean aritu dira. Egutegi nazionaleko hitzordurik garrantzitsuena da Espainiako Txapelketa, eta denboraldia borobiltzeko merezitako ginga izan da atleta askorentzat.
Emaitzen artean aipatzekoa da Alejandro Estebanek, Iker Arozenak, Naia Llorentek, Olaia Becerrilek, Douae Ouboukirrek, Aslin Quialak eta erreleboetako taldeak egin zuten lana. 4x400metroetan aritu ziren Alaine Agerralde, Alazne Garrido, Alazne Etxebarria eta Irati Fernandez, eta azkenean, seigarrenak izan ziren. Txapelketako azken proba izan zen emakumezkoen errelebo proba, eta bertan, Euskadiko errekorra gainditzea lortu zuten, 3:42.24 minututan. Lehia estua izan zuten amaierara arte, eta podiumarengandik bi segundo eskasera gelditu ziren.
Esteban xabalinan aritu zen, eta 70,86 metroko jaurtiketa lortuta laugarren amaitu zuen. Arozenak ez du denboraldian zehar zore handirik izan lesioak direla eta, azken asteotan maila izugarrian aritu da, baita Malagan ere. Luzerako proban seigarrena izan da, 7,69 metroraino iritsita. Altuerako proban ere Super Amara BAT taldeak presentzia izan du, Llorente 1,70 metroko langa gainditzea lortu zuen zazpigarrena amaituz. Luzeran eta 3.000 metro oztopoetan, Becerrilek eta Ouboukirrek zazpigarren postuan amaitu zuten jarduna, besteak beste. Luzerako jauzian 6,19 metroko saiakera onena lortu zuen Becerrilek eta Ouboukirrek kronoa 10:14.74 minutuan gelditu zuen.
Bestalde, Quiala pertikan laugarrena izan zen. Ezin izan zuen puntuazio ofizialik lortu, nahiz eta egindako jauzi bakarrean 3.91 metroko langa gainditzea lortu. Lehiaketatik kanpo parte hartu zuen, eta jauzi bakar horrek laugarren postuan kokatuko luke.
Finaletatik kanpo, emaitza onak
Finalean egon gabe, parte hartu duten atleta guztiek emaitza oso positiboak lortu dutela adierazi du klubak. Uxia Pereira, 100 metro hesietan; Alazne Garrido, 400 metro hesietan; Ander Aramendi, 1.500 metroetan; Arinette Ngole, diskoan; Carla Arwen Martinez, 100 metroetan; eta, Manu Rodriguez, 110 metro hesidunetan, finaletik oso gertu izan dira.
Espainiako Txapelketatik Mundukora
Alaine Agerralde 400 metro hesidunetan Euskadiko txapeldun izan zen, eta horrek Espainiako Txapelketarako txartela eman zion. Espainiakoan, berriz, ezin zuen bakarka parte hartu, berriki, Munduko Txapelketa jokatzeko deia jaso baitu. Hortaz, asteburu honetan soilik 4×400 erreleboetan parte hartu zuen. 20 urtez azpiko Munduko Txapelketa Oregonen (AEB), abuztuaren 5etik 9ra. Agerraldek jokatu beharko duen lehenengo proba abuztuaren 6an izango da.
