Emaitza anitzak eta itsaso gogorrak asteburuan
Gizonezkoek estropada ederra egin zuten larunbatean, baina igandean azken aurrekoak izan ziren. Emakumeek, postu txarra izan zuten larunbatean, haizeak eraginda.
AITOR ARRIZABALAGA Asteburu arraroa izan da pasatakoa Hondarribia Arraun Elkartean. Sailkapen ezberdinak jaso dituzte hiru traineruek, baina ez dute banderarik lortu. Neskek denboraldiko sailkapen okerrena izan zuten larunbatean, baina igandean berriro bigarrenak izan ziren. Mutilek, Donostiako estropada gogorrean bigarren postua lortu zuten, baina igandean azken aurrekoak izan ziren. Bigarren traineruak aldiz, sailkapen orokorrean haren alboan dabiltzanekin lehia gogorra izan du.
Itsaso gogorra izan da asteburuan euskal kostaldean, eta noski, traineruek ederki nabaritu dute. Larunbatean, Donostian ziren Euskolabel eta Euskotren ligak, baina azken hauek ez zuten azkenean arraun egin. Gizonezkoek, erlojupekoa egin zuten, eta Ama Guadalupekoak haren indarra erakutsi zuen, bigarren postuan sailkatuz, Orioren atzetik. Denboraldiko sailkapen onena da bigarren postua oraingoz gizonezkoentzat, baina igandean ezin izan zuten errepikatu.
11. postuan izan ziren atzo, itsasoak eta haizearen menpe. Igandean, lehen txandan Bermeo lehiatu zen, larunbatean penalizazioa jaso zuelako, baina halere, Getxoko estropada irabazi zuen. Ez zen egun erraza izan, ezta ere sailkapeneko lehenengoarentzat, Oriorentzat, zortzigarren postuan gelditu ziren eta. Hondarribiak, ohorezko txandako hirugarren postua lortu zuen. Bosgarren postuan dago orain Ama Guadalupekoa orokorren, laugarrenetik (Getaria) sei puntura. Ioseba Amunarriz patroi onena bezala mantentzen da. Asteburu honetan Santurtzin eta Lekeition izango dira.
Emakumezkoak ere haizearen menpe egin zuten arrauna larunbatean. Ohorezko txandarako asko aldatu zen itsasoa, eta desabantailaz aritu ziren sailkapen orokorreko lehen lauak. Sestaon izan zen estropada, eta seigarren postuan bukatu zuen Hondarribiak. Halere, haien sailkapen orokorreko etsai nagusia, Zarautz, zazpigarren gelditu zen. Atzo, berriro ere gora itzuli zen Ama Guadalupekoa, bigarren postura zehazki. Zarauztarrak irabazi zuten estropada, lehenengo ziabogan jada lehenengoak izanik. Halere, sailkapen orokorrean Hondarribia da lehenengoa oraindik, sei jardunaldiren faltan 64 punturekin. Zarautzek 61 ditu. Larunbatean Ondarroan lehiatuko dira, eta igandean deskantsatzeko aukera izango dute.
Oreretakoekin lehian
Bigarren traineruak lehen postua lortu zuen bere txandan larunbatean, eta zazpigarren izan zen sailkapen orokorrean. Igandean, aldiz, hamargarren postuan gelditu ziren. Hibaikarekin lehia gogorra izaten ari dira Hondarribia B traineruko arraunlariak. Atzo, Hibaikak postu hobea lortu zuen, baina orokorrean oraindik aurretik dabil Ama Guadalupekoa, 46 punturekin. Hibaikak 43 ditu. Asteburuan Kantabrian izango dira, larunbatean Pedreñan eta igandean Santaderren.
