Espainiako onenen artean izango dira bidasoarrak
Bihartik, hilak 24, igandera bitarte, Super Amara BATeko 15 atleta izango dira Maila Absolutuko Espainiako Txapelketan, Malagan.
Alaine Agerralde 20 urtez azpiko Espainiako Txapeldun izan zen.Super Amara BAT Asteburu honetan, egutegiko urteko lehiaketa garrantzitsuenaren txanda izango da: Maila Absolutuko Espainiako Txapelketa. Super Amara BAT taldeak ez du hutsik egingo, eta taldeko hamabost atleten presentzia edukiko du talde bidasoarrak. Txapelketa bihar hasi, hilak 24, eta igandera bitarte, maila handiko probak izango dira Malagan. Lehiaketa honetan parte hartzeko gutxieneko marka lortzea ezinbestekoa da, eta aurreko hilabeteetako lanari esker hamabost atletak bertan parte hartzeko txartela eskuratu dute.
Honako hauek izango dira asteburu honetan Malagara bidaiatuko duten atleten ordutegiak:
Ostirala
-
Arinette Ngole – Disko jaurtiketa (11:05) Finala
-
Carla Arwen Martínez – 100 m (11:35) Kanporaketa
-
Alazne Garrido – 400 m hesiak (20:35) Finalerdiak
-
Olaia Becerril – Luzera jauzia (21:50) Finala
Larunbata
-
Ander Aramendi – 1.500 m (11:40) Finalerdiak
-
Aslin Quiala – Pertika jauzia (20:00) Finala
-
Douae Ouboukir – 3.000 m oztopoak (21:35) Finala
Igandea
-
Uxia Pereira – 100 m hesiak (11:10) Kanporaketa
-
Manuel Rodríguez – 110 m hesiak (11:40) Kanporaketa
-
Naia Llorente – Altuera jauzia (20:30) Finala
-
Alejandro Esteban – Xabalina jaurtiketa (20:35) Finala
-
Iker Arozena – Luzera jauzia (21:15) Finala
-
Alazne Atxebarria, Irati Fernández, Alazne Garrido eta Alaine Agerralde – 4x400m erreleboak (23:15) Finala
Bestalde, Alaine Agerraldek Espainiako Txapelketaz gain, 20 urtez azpiko Munduko txapelketa du begiz jota. 400 metro hesidun proban Espainiako Txapelketarako gutxieneko marka lortu arren, ez du bertan parte hartuko. Soilik, 4x400m erreleboetan parte hartuko du Munduko Txapelketa ahalik eta hobekien prestatzeko. Abuztuaren 5etik 9ra bitarte, Eugenen (Oregon) izango da, eta erreleboetako bi probatan -emakumezkoen 4x400m eta 4x400m mistoa- parte hartuko du. Honela, Agerraldek “denboraldi harrigarriari amaiera bikaina” emango dio.
Irun 5K miliako lasterketako txeke solidarioa, 850 eurokoa
Urtero legez, Irun 5K milia lasterketan bildutako diruaren txeke solidarioa banatu dute. Onuraduna Gipuzkoako Minbiziaren Aurkako Elkartea izan da, eta guztira 850 euro bildu dituzte. “Aurten, diru bilketa 100 euro handitu da iazkoarekin konparatuta”, azaldu du Ibon Muñozek, Super Amara BATeko gerenteak. Gema Landachek, Gipuzkoako Minbiziaren Aurkako Elkarteko kideak, ere esker oneko hitzak adierazi zituen: “Horrelako ekimenei esker elkarteak doako zerbitzuak eskaintzen jarrai dezake bai minbiziak eragindako pertsona guztiei nola beren familiei”.
Agur Leire Sport
Denak ez dira albiste onak izango. Irunek baditu betiko komertzioak hainbat arrazoirengatik erreferente bihurtu direnak. Horietako bat Mendibil merkatal guneko Leire Sport kirol denda da. 50 urteren ondoren, Leire eta Felipe Martinezek pertsiana itxiko dute. Irungo kirol klubentzat, tartean Bidasoa Atletiko Taldearentzat, erreferentziazko denda izan da. “Super Amara BATek eskerrak eman nahi dizkio Leire Sporti kirolarekin izandako inplikazioagatik eta eskualdeko klubekin egindako lanagatik. Komertzioaren jabeak diren Leire eta Felipe Martínezi onena doazkiogu beren etapa berrian”.
