San Migel-Anakako eremuaren urbanizazioa, aurrera
Obrak hasi zituztenetik lau hilabete pasa dira, eremua progresiboki urbanizatuko dute eta aurreikuspenen arabera, 2030erako prest izango da.
San Migel-Anakako eremuaren berrurbanizazio lanek aurreikusitako martxan aurrera jarraitzen dute. Obrak hasi eta lau hilabetera, atzo Cristina Laborda alkateak eta Idoia Yarza IRUNVIko zuzendariak eremua bisitatu zuten. Eremu honetan 2030rako 1.182 etxebizitza eraikiko dituzte, eta horietatik 887 babes publikokoak izango dira. “Urte askoan, San Migel-Anakako eremua teoria hutsa izan da. Baina gaur errealitatea da, eta hiria eraldatzen ari da pixkanaka. Obra hauetan egindako aurrerapauso bakoitzak gure helburura gerturatzen gaitu”, adierazi zuen alkateak.
Martxotik gaurdaino, Lekaenea ikastetxeko atzealdeko patioko obrak eta Donostia kaleko saneamendu lanak egin dituzte. Datozen asteetan, ekaitz-tangaren obren bigarren fasea hasiko dute, eta hori egin bitartean, Jaizkibel kalearen eta Julian Sanchez parkearen arteko pasabidea itxiko dute. Abuztuan ere, Sancheski enpresaren eraikina eraitsiko dute. Honela, 15 eta 20 hilabete arteko epearekin San Migel eta Anaka lotuko dituen erdiko bidea egingo dute.
Dagoeneko, Anaka kaleko etxebizitza libreen eraikuntza hasi dute, hauek modu mailakatuan eraikitzen ari dira, urtebeteko epean. Aurreikuspenen arabera, 2028tik 2030era bitartean entregatuko dituzte. Babes ofizialeko etxebizitzei dagokienez, Irungo Udalak, IRUNVIren bidez, 147 etxebizitza sustatuko ditu, Gibenaka biribilgunearen eta Letxunborro etorbidearen artean eraikiko dituzte 2028tik aurrera, 2030ean entregatzeko. Eusko Jaurlaritzak, berriz, 447 etxebizitza garatuko ditu, alokairu erregimenean, VISESAren bidez. 2028an hasiko dira horiek eraikitzen, eta 2029an eta 2030ean entregatuko dituzte.
Bosgarren eta azken fasean, etxebizitza publiko gehienak eraikiko dituzte. Fase honen baitan, eremuaren urbanizazioa eta etxebizitzen garapena dago. San Migel eta Anaka auzoen arteko ingurune kohesionatua eta batua eraikiko dute oinezkoentzako espazio berrien, plazen, bizikleta-bideen, ekipamenduen, saltokien eta etxebizitzen bidez. Urbanizazio obra hauek hiriaren mendebaldea erabat eraldatuko dutela adierazi du udalak.
