Larunbatean marmitako usaina izango da Alameda inguruan
Txapelketaren laugarren edizioa egingo dute Santiago egunean. Partaideei hegaluzea emango zaie, baina beste dena haien esku geratuko da.
Santiago egunak arrantzaleak ditu protagonistak. Arratsaldean, kutxaren ibilaldiarekin begi guztiak Portura hurbiltzen dira, baina goizean, jada duela urte batzuetatik, hegaluzeak Alamedako inguruak hartzen ditu. Marmitako txapelketa egingo dute beste urte batez Damarri plazan, laugarren aldiz. Zumardikoak elkartearen eskutik egindako egitasmoa da, eta 09.00etan hasiko da.
Partaideek, mende askoz herriko etxeetan egindako plater goxoa sukaldatu beharko dute. Horretarako, Zumardikoak elkarteak hegaluzea emango die. Beste osagai guztiak partaideek ekarritakoak izan beharko dira. Berdin suarekin eta kazolarekin, partaideen kontu.
Epaimahaia pertsona ezberdinek osatuko dute. Alde batetik, Hondarribiko ostalaritzako jendea izango da, antolatzaileen esanetan “eskarmentu handikoak”. Era berean, itsas munduko ordezkariak ere bertan izango dira. Errezeta librea izango da, baina partaideek epaileen gustuak kontuan hartu beharko dituzte, noski.
Ostiralera arte izango dute parte hartu nahi dutenek izena emateko aukera. 621 154 622 telefonoan egin beharko dute kontaktua. “Zumardikoak Hondarribiak eskerrak eman nahi dizkie Hondarribiko Udalari, HAZI Fundazioari, Done Pedro Itsas Gizonen Kofradiari eta Kofradia Itsas Etxeari, ekimen hau posible egiteagatik”, esan dute antolatzaileek.
