Iker Piñeirak 20 urtez azpiko Europako Txapelketan bi domina eskuratu ditu
200 metroko proban brontzezko domina eskuratu du, eta taldekako erreleboetan zilarra lortu du, Rietin (Italia) asteburu honetan jokatutako txapelketan.
Iker Piñeira gazte mailako Europako atleta onenen mailan dagoela berretsi du asteburu honetan, Rietin (Italia). 20 urtez azpiko Europako Txapelketan bi domina eskuratu ditu, zilarrezkoa taldekako erreleboetan eta brontzezkoa 200 metroko proban. Piñeiraren lehenengo urtea da atletismoan, eta denboraldian zehar pilatutako emaitzak maila izugarrian dagoelako seinale dira. Europako Txapelketara bederatzigarren postuan heldu zen, finalerako sailkatzeko helburuarekin. Ostiraleko kanporaketan lehenengoa izan zen, eta larunbateko finalerdietarako txartela eskuratu zuen.
Larunbat goiza amestutako goiza izan zen atletarentzat, aurrekusitako helburua bete zuen eta. Finalerdian, Espainiako Txapelketan lortutako marka pertsonala “txikitu” zuen, kronoa 21.08 segundoan ezarriz. Horrek arratsalderako bultzada eman zion, eta finalerako ez zuen ezer gorde. Finala oso lehia estuko proba izan zen, eta azkenean, 21.08 segundoko marka egin zuen, beste behin ere. Urrea Bronson britaniarrarentzat izan zen, eta zilarrezkoa, berriz, Barosz poloniarrarentzat.
200 metrotan brontzezkoa domina lortuta, azken proba zuen begiz jota Piñeiraak. Kasu honetan, taldekako erreleboetan aritu zen atzo, hilak 19, 100m+200m+300m+400m proban. Super Amara BAT taldekoak 200 metroko lasterka egin behar izan zuen, eta kanporaketa pasata, finalean bigarrenak izan ziren. 1:51.81eko Espainiako errekorra ezarri zuten lau kirolariek. Proba honekin Piñeirak amaiera eman zion atleta gisa egindako lehenengo denboraldiari.
Espainiakoan ere bikain
Europako Txapelketan jokatu bitartean, Albaceten 20 urtez azpiko Espainiako Txapelketa jokatu zuten hainbat kirolarik. Espainiako kluben artean zortzigarren postuan kokatu da, eta lortutako emaitzak “etorkizun oso oparo” baten erakusgarri dira.
Podiumeko hiru mailatan izan ziren Super Amara BATeko atletak. 400 metro hesidunetan Alaine Agerralde Espainiako txapeldun izan zen, 59.25 segundoko marka lortuta. Dagoeneko prest dago datorren asteburuan maila absolutuko Espainiako Txapelketan dena emateko. Arielle Antoinette Ngolek zilarrezko domina eskuratu zuen diskoan, 44,65 metroko distantzia lortuta. Brontzezko domina Naia Llorentek eraman zuen altueran. Llorentek 1,74 metroko langa gainditzea lortu zuen, eta horri esker maila absolutuko Espainiako Txapelketan izango da.
Podiumean izan ez arren, klubak Noa Sevillak, Noa Estebanek, Isra Rahalik, Jon Gajatek, Seckou Sissokok, Markel Garranchok, Alai Cabellok, Izaskun Sanzek, Lukas Cabazonek, Julen Mendozak eta Imanol Ibarbiak egindako lana nabarmendu du.
Frantziako txapeldun
Bestalde, Alain Oca 18 urtez azpiko Frantziako txapelduna izan da mailuan. Maila handiko lehiaketa egin duela azpimarratu du klubak, “ziur gaude etorkizunean ere zer esan handia emango duela”. Urrezko domina meritu handiko 65,92 metroko jaurtiketari esker lortu zuen, eta jaurtiketa honi esker bere marka pertsonal berria ezarri du.
