Gizonezkoek gustua hartu diote ohorezko txandari
Emakumeek beste bandera bat lortu dute, eta gizonezkoek gora egin nahi dute sailkapen orokorrean.
Amunarriz, patroi onenaren saria jasotzen. AITOR ARRIZABALAGA Hondarribia Arraun Elkarteko bi lehen traineruetan bi errealitate ezberdin daude egun. Emakumezkoek igoera nahi dute, lehenengo maila horretara itzultzea, eta oraingoz bide onean doaz. Gizonezkoek aldiz, etxeko eskifaia gazte bat osatuz, maila altua erakutsi nahi dute Eusko Label ligan, ohorezko txandari eutsiz. Beste bandera bat irabazi dute neskek, denboraldiko bosgarrena, eta mutilek, bi hirugarren postu lortu dituzte asteburuan, Galiziako uretan.
Ezin hobe dabiltza neskak, eta asteburu honetan berriro ere erakutsi dute. Aurreko urtean Euskotren Liga atzean utzi behar izan zuten, baina indarrez dabiltza berriro ere gora itzultzeko. ETE Ligako lidergoa sendotzen jarraitzen dute, asteburu honetan Portugaleten. Aurreko estropadetan bezala, lehenengo ziabogan ez ziren lehenengoak izan berdezkoak, Zarautz gailendu zen eta, baina bigarren eta azken luzean Ama Guadalupekoak ederki erakutsi zuen zergatik diren oraingoz liderrak. Zarautz aurretik pasa eta hiru segundotara utzi zuten helmugan. 54 puntu dituzte jada, eta Zarautzek, atzetik, 51. Sestaon eta Zumaian izango dira asteburu honetan.
Gizonezkoak gora doaz ere, eta aurreko asteburuko sentsazio onak bertan jarraitzen du. Larunbatean, Chapelan (Redondela, Galizia) bigarren txandan lehiatu ziren, eta lehenengoak izan ziren, Donostiarrarekin lehian aritu ondoren. Lehen ziabogan denbora berdina egin zuten bi gipuzkoarrek, baina hortik aurrera Ama Guadalupekoa gailendu zen. Kosta ondoan izaten da Redondelako bandera, hondartzaren eta muskuiluak hazten diren bateen artean. Lehenengo aldiz jokatu da bertan Eusko Label Ligako estropada bat.
Ohorezko txanda gertu
Atzo ohorezko txandan izan zen Hondarribia, eta ederki egin zuen, Urdaibai atzean utziz. Bueun lehiatu ziren, ur lasai eta geldietako estropada eremuan. Oriok irabazi zuen berriro ere, baina Ama Guadalupekoak hirugarren postua errepikatu zuen. Zierbena izan zen lehenengoen eta hirugarrenen artean. Era berean, Ioseba Amunarriz patroi onenaren sailkapenean lehenengoa ezarri da. Asteburu honetan Donostian eta Getxon izango dira. Larunbatean bigarren txandan egongo da Hondarribia, baina jada Getariarekin berdinduta dago sailkapen orokorrean, 60 punturekin. Bosgarren da Hondarribia eta laugarren Getaria. Gutxi falta zaie Mikel Orbañanosen mutilei ohorezko txandara sartzeko.
Gizonezkoen bigarren taldeak erlojupekoa izan zuen larunbatean Erandion. Lehenengo txandako aurkariei eutsi nahi izan zien, baina azkenean Hibaika gailendu zen txandan. Bederatzigarren postuan amaitu zuten Gonzalo Carrionen mutilek, eta sailkapen orokorrean zortzigarren dira, Hibaika dutela atzetik, forma onean.
