Presa eraikin inguruko 65 aparkaleku berriak irekiko dituzte bihar
Udalaren eskuetan daude jada Presa eraikineko aparkalekuak. 55 daude aurrean, eta Biteri kalean beste 10.
Bihar irekiko dituzte Presa eraikineko aparkalekuak. 55 izango dira, erabilera librekoak, eta beste bi mugikortasun urriko pertsonentzakoa. Biteri kalean ere beste hamar aparkaleku irekiko dituzte, eta, beraz, osotasunean 65 plaza berri irekiko dira.
Baina aparkalekuak ez ezik, espaloiak ere udalaren espazioa izango dira. Orain arte, bertatik pasatzen ziren pertsonak bidegorritik pasa behar ziren, baina hori ere bihartik aurrera konponduko da.
“Badakigu aparkatzeko zailtasunak eguneroko errealitate direla hondarribiar askorentzat. Horregatik, aukera guztiak aztertzen eta proiektu berriak sustatzen ari gara, herritarren bizi-kalitatea hobetzeko eta auzo guztietan irtenbide errealak eskaintzeko. 55 plazako aparkaleku berri honek herrian dagoen aparkatzeko premia arintzen lagunduko du, baina jakitun gara ez dela arazoa konpontzeko nahikoa. Etengabe ari gara lanean hondarribiarren mugikortasunaren beharrei erantzuteko”, adierazi du Igor Enparan alkateak.
HAPOa, abiapuntua
Aparkalekuak erdigunean jarriz, HAPOa puntu garrantzitsua izango da. Antolamendu berriak hainbat aparkaleku berri egiteko aukera irekiko du, hala nola Zezen Plazako lurpekoa. Udal gobernuak nabarmendu du “aparkaleku-politika ez dela neurri bakar baten bidez konpontzen den erronka, baizik eta epe motzeko eta luzeko jarduketen bidez landu beharreko auzia” dela.
