Musika elektronikoa, eguzkiarekin eta ilargiarekin
Larunbatean Kasino Zaharrean hasiko dute festa, Lotura elkartearen eskutik, eta N97 kolekiboa oholtzara igoz. Itxaropena tabernan amaituko dute gaua.
Lotura elkarteak ongi ezagutzen ditu gaur egun pil pilean dauden musika generoak. Musika elektronikoa da horietako bat, gazteen eta helduen gustukoa. Hori bera eskainiko die hondarribiarrei, eta uda izanda, kanpotik datozen turistei. Larunbatean, Kasino Zaharrean izango da giroa, eta gau partean, Itxaropena tabernara mugituko dute musika. N97 kolektiboko musikariekin kontatuko dute egunean zehar, haien musika jarri dezaten.
2023. urtean sortu zuten N97 proiektua, musika elektronikoa balioan jartzeko eta festa giroan haren presentzia areagotzeko. Irune Muguruzaren eta Iñigo Jimenezen ekimena izan zen, eta urteen poderioz, hainbat DJ joan dira gehitzen proiektura. Larunbatean, Muguruza bertan izango da, eta beraz gain, Crobeau, Gorks, Anderetx eta Jota izango dira. DJen soinuak zabaltzeko, Reparation Sound Systemen soinu ekipoa erabiliko dute, hau da, sound systema.
17:00etan hasiko da musika Kasino Zaharrean, eta bertan edaria erosteko aukera izango da. 00:00ak arte iraungo du bertako festak, baina dena ez da amaituko. Ondoren, soinu mahaiak hartu eta Itxaropena tabernara joango dira, 04:30eak arte. Bertan j-303, Aritz Irazoki, Xabi Uranga eta Jota elkartuko dira, Portuan ere doinu elektronikoak hedatzen.
N97 eta Lotura xede berdinarekin sortutako proiektuak dira: musika elektronikoari espazioa ematea, Bidasoan erdigunea jarriz. Azkeneko urteetan jaietako txoznetan ikusi da Lotura, bertan haien txozna jarriz, eta eskualdeko DJ ezberdinei musika jartzeko aukera emanez.
