Uda Jolasen gazteleraz hitz egiteagatik zigorrak izan ote diren jakin nahi du PSE-EEk
Talde sozialistak aita baten salaketa publikoa hartu du oinarri, eta adierazi du ikerketa eskaera bat aurkeztu duela udalean.
Uda Jolaseko artxibo argazki bat PSE-EEk jakin nahi du ea egia den Uda Jolas programako haurrak zigorrekin mehatxatuak izan ote diren euskaraz ez hitz egiteagatik. Sozialistek egindako eskakizuna udal gobernuari zuzendutakoa da, umeetako baten aitak egindako salaketa publiko baten harira. Aita horrek adierazi du haurrak zigortuta gelditzen direla gaztelaniazko hitzak edota esaldiak erabiltzen dituztenean.
PSE-EEk esan du salaketa hori egia balitz, jarrera “onartezina” izango litzatekeela Udas Jolas zerbitzuaren aldetik, eta jarrera horiek ez dutela balio “euskara sustatzeko eta zaintzeko, kontrakoa baizik”. Horregatik, “berehala eta erradikalki” moztu behar direla uste dute.
PSE-EEk eskaera bat erregistratu du, “udalak ahalik eta azkarren jardun dezan eta gertatutakoa argitu dezan”. Honakoa da, puntuz puntu, eskaera:
- Salatutako gertaerak ofizioz ikertzea.
- Salatzaileak eskatzen duen bezala, gaztelaniaren erabilera bereizteko ohar horiek udalaren edo begiraleen berezko ekimen bat diren jakinaraztea.
- Argi eta garbi adierazi behar da nortzuk diren Udal Jolasaren arduradunak, beharrezko prestakuntza pedagogikoa duten, adingabeekin lan egiteko egokiak diren eta, Udaletik kanpoko enpresa bat bada, kontratazio-prozesuari buruzko informazioa ematea.
- Salaketak egiazkoak badira, monitoreak berehala ordezkatzea, haiengandik espero den lanaren araberako balio demokratiko eta pedagogikoak egiaztatzen dituzten beste batzuengatik.
