"Munduan geuk ordezkatzen dugu geure burua, ez beste inork"
Giza katea egin du gaur arratsaldean Gure Eskuk Irun eta Hendaia artean. Euskal Selekzioaren ofizialtasuna eskatu dute, adieraziz beste edozein herriren pare egon nahi dutela.
Espainiako eta Frantziako selekzioek Munduko Kopan jokatzen duten egunean, Euskal Selekzioaren aldeko aldarrikapen sendoa egin nahi izan du Gure Eskuk. Giza kate bat egin dute, Irun eta Hendaia lotu dituenak. Etorbidea zubian hasi dira, eta bigarren zubitik pasata itzuli guztia eman dute bertaratutako ehunka pertsonek.
Aldarrikapena argia zen: ofizialtasuna eskatu dute. “Munduan geuk ordezkatzen dugu gure burua, ez beste inork. Horregatik, kirol arloan, nazioartean gu ordezkatzen gaituen selekzio nazional bakarra Euskal Selekzioa da”, adierazi dute Gure Eskuko ordezkariek. Herri burujabea izateko nahia lau haizeetara oihukatu dute, eskuetan zeramaten banderolak eta pankartak astinduz.
Euskal herritarrei mezu argia zabaldu diete: “Kalera atera ditzagun gure koloreak eta ordezkatzen gaituzten ikurrak. Ez dugu beldurrik, ez dugu lotsarik nor garen, zer garen aitortzeko”. Era berean, Euskal Herriko eragile sozial, politiko eta instituzionalei dei egin nahi izan diete, “bakoitzak bere esparrutik edo ahalmen eta eskumenetatik, bultza dezaten Euskal Selekzioaren ofizialtasuna lortzeko jauzi bat”. Eskakizunez gain, eskerrak ere eman dituzte, bereziki Euskadiko Futbol Federazioari, egiten duten lanagatik.
Futbolaz ari dira, baina haien mezua kirol guztietara zabaldu nahi dute, eta era berean, gizonezkoen selekzioetara eta emakumezkoen selekzioetara. “Izan gaitezen ausartak, izan dezagun anbizioa, aprobetxa dezagun edozein aukera eta egin dezagun jauzi bat”. Ez da kasualitatea horrelako ekitaldi bat Bidasoan egitea, Bidasoa ibaiaren gainean, Gipuzkoaren eta Lapurdiren arteko mugan. “Bidasoaren bi aldeetan herri bera dago, kirola maite eta grinaz bizi duena eta, historikoki, kirola gizartea kohesionatzeko eta komunitatea egiteko erabili duena”.
Hona hemen gaur HITZAk ateratako argazkiak:
