Neskak geldiezin eta mutilak gorantz
Bi estropadatik bi bandera atera ditu nesken traineruak asteburuan. Mutilek, maila ona erakutsi zuten larunbatean, eta ohorezko txandan izan ziren igandean.
Beste bi bandera, hirugarrena eta laugarrena, lortu dituzte Hondarribia Arraun Elkarteko neskek. Asteburu bikaina izan da arraunlarientzat. Gainera, sailkapeneko lehenengoak finkatu dira, Zarautz atzetik dutela. Gizonezkoen lehenengo taldeak denboraldiko estropada onena egin zuen larunbatean, eta hirugarren postua lortu zuten, ia ia bigarrena lortuz. Atzo, ohorezko txandan izan ziren, eta ongi aritu ziren, txandako hirugarren postua lortuz.
Camargon (Kantabria) lehiatu ziren larunbatean. Zarautzekin, Deustorekin eta Kaikurekin batera hasi zen Hondarribia, 2. txandan. Lehenengo ziabogan txandako azkenak izan ziren hondarribiarrak, baina bigarren luzean denak aurreratu zituen, estropadako lehen postua lortuz. Zarautzekin batera mantendu zen lehia, baina azkenean Osertz Aldayk zuzendutako neskek haien maila erakutsi zuten. 11.35.42 egin zuen Hondarribiak, eta 11.38.71 Zarautzek.
Atzo ere, bandera Lekeition. Berriro ere, lehen ziabogan Zarautzen atzetik pasa zen Hondarribia. Bigarren luzeko lehen erdia elkarrekin egin zuten Zarautzek eta Hondarribiak, baina azkenean Ama Guadalupekoa gailendu zen, zarauztarrak atzean utziz, 7 segundotara. Itsasoan izan zen estropada, baina ura ez zegoen hain zakarra. Hondarribiak 11.26.98 egin zuen, eta Zarautzek 11.34.10.
Larunbatean, Euskolabel Ligan Donostiarra izan zen protagonista handienetarikoa, ziaboga gainetik pasa zutelako, estriborretik hartuz. Olatua hartuz iritsi ziren, eta ziaboga bete betan harrapatu. Oriok ere ez zuen haren egun onena izan, eta beste traineruek hori aprobetxatu zuten. Bermeok bereganatu zuen denboraldiko bigarren bandera, Getaria izan zen bigarrena eta Honarribia hirugarrena. Bigarren txandan izan zen Ama Guadalupekoa eta lauetatik azkarrena izan zen. Sailkapeneko bigarrena, Getaria, soilik 12 ehunetara utzi zuten. Orio laugarrena izan zen, baina sailkapen orokorrean lehen postuari eusten dio.
Orion bi estropada
Euskolabel Ligako atzoko estropada Orion izan zen, kanpoaldean. Etxekoek irabazi zuten, larunbateko postu txarra hobetzeko grinarekin. Lehen txandan izan zen Ama Guadalupekoa eta egin beharrekoak bete zituen. Hirugarren izan zen txandan, eta bosgarren orokorrean, 21 segundotara. 40 puntu ditu Hondarribiak sailkapen orokorrean, eta Donostiarrarekin berdinduta geratu da bosgarren eta seigarren postuan. Aste honetan Galiziala joango dira, eta Chapelan eta Bueun jokatuko dituzte bi estropadak.
KAE1 ligan, Orion izan ziren larunbatean Gonzalo Carrionen mutilak. Bigarren txandan lehiatu ziren, San Pedro, Astillero eta Pedreña taldeen aurka, eta txandako azkenak izan ziren. Lehenengo txandako Hibaikak ere Ama Guadalupekoa garaitu zuen, eta bera, sailkapen orokorrean zortzigarrenak izan ziren. Asteburu honetan Erandion izango dira, sailkapen orokorrean zortzigarrenak izanik.
