Iker Piñeira, Europako Txapelketarako prest
200 metrotan 18 urtez azpiko Espainiako txapeldun izan ondoren, hilaren 16tik 19ra Rietin (Italia) izango da Europako onenekin batera.
Super Amara BAT taldeak emaitza positiboak pilatzen jarraitzen du asteburuz asteburu. Pasa den astean, 18 urtez azpiko Espainiako txapelketa jokatu zen, eta 200 metroko proban Iker Piñeira bidasoarra garaile izan zen. 21,20 segundoko marka pertsonala egitea lortu zuen, eta horri esker, Europako Txapelketarako txartela lortu zuen. Hortaz, datorren asteburuan, hilaren 16tik 19ra bitarte, Rietin (Italia) izango da 18 urtez azpiko Europako atleta onenekin batera. 200 metroko probaz gain, erreleboetan ere aritzeko hautatu dute.
Bestalde, asteburu honetan Caceresen (Extremadura) 23 urtez azpiko Espainiako Txapelketa jokatuko dute, eta bertan Super Amara BAT taldeko bederatzi atleta izango dira hainbat diziplinatan. Bihar eta etzi lehia handia izango da probetan; bidasoarrak prest daude emaitza bikainak lortzeko.
Honako atleta hauek izango dira Espainiako txapeldun izateko lehian Caceresen: Carla Arwen Martinez, 100 metrotan; Alejandro Per, 400 metrotan; Ander Aramendi, 1.500 metrotan; Mikel Aramendi, 3.000 metro oztopoetan; Aritz Zuazo, gorako jauzian; Mario Estanga, pertikan; Alejandro Esteban, xabalinan; Unax Eraso, mailu jaurtiketan; eta, Bruno Cagigos, disko jaurtiketan.
