Euskal Selekzioaren ofizialtasuna aldarrikatzeko giza katea egingo dute
Gure Eskuk, Zazpi Baietzek eta Gu Ere Baik deituta, Irun eta Hendaia lotzen dituen Etorbidea zubian egingo dute datorren asteartean, 17:00etan hasita.
Euskal Selekzioaren aldeko herri argazkia egin zuten Oiartzunen. Munduko Kopa jokatzen ari den bitartean, Euskal Selekzioaren aldeko egitasmoak ugariak izan dira Euskal Herrian. Datorren asteko hitzordua Irunen izango da, Etorbidea zubian. Gure Esku, Gu Ere Bai eta Zazpi Baietz mugimenduek deituta, datorren asteartean, hilak 14, giza katea antolatuko dute Irun eta Hendaia lotzen dituen zubian. 17:00etan hasita herritarrei gonbita egin diete bertaratzeko, baita haren elastikoak janzteko ere. “Nazioa gara, gurea Euskal Selekzioa da, eta horiek dira gure koloreak”, adierazi dute komunikatuan.
Uztailaren 14an egiteak bi arrazoi nagusi dituela azaldu dute. Batetik, Errepublikaren eguna da Frantzian; eta bestetik, gaur Belgikaren aurkako partidan Espainiak irabaziko balu, asteartean Frantziaren aurkako finalerdietako partida izango luke. Hori horrela, arrazoiak ez dira faltako Euskal Selekzioaren aldeko aldarriak kalera ateratzeko, eta “gure koloreak eta aldarriak” zein diren erakusteko.
EH Bilduk bat egingo du deialdiarekin: “Oztopo, inposizio zein debekuen gainetik, jauzi bat behar dugulako Euskal Selekzioak modu ofizialean eta berdintasunez parte har dezan nazioarteko txapelketetan”.
