Txanika eta Kanpan, Hondarribiko Grand Slamean presente
Uztailan eta abuztuan jokatuko da Hondarribiko Grand Slamak. Emakumezkoen lehian maila oso altua izango da, munduko txapeldunak barne.
Bihar hasiko da Hondarribiko Grand Slama, zesta puntako maila altua erakutsiko duen txapelketa. 20. aldiz egingo dute, eta aurten ere, herriko bi pilotari izango dira roster-ean. Oier Kanpandegi Kanpan eta Julen Basterretxea Txanika lehian izango dira, baina ez elkarrekin. Ostiraletan izango dira partiduak, 20:00etan, Jostaldin. Sei bikotek osatuko dute lehia eta haien artean jokatuko dira, finalerako plaza baten bila, garaipena ortzimugan dutela.
Erik-Kanpan, Hormaetxea-Aratz, Benetrix-Oierdi, Txanika-Bailo, Bixente-Ekhi eta Urrutia-Oyhenard izango dira Jostaldin lehiatuko diren sei bikoteak. Bihar egingo dute lehen partida, Bixente-Ekhi eta Urrutia-Oyhenard bikoteen artean. Etxeko pilotariak ikusteko, hurrengo astera itxoin beharko da. Kanpan izango da lehena debutatzen, eta Erikekin batera Hormaetxea eta Aratz izango ditu aurrean. Txanikak, aldiz, uztailaren 24ra arte itxaron beharko du.
Emakumezkoen Grand Slamak abuztuan izango ditu bere partidak. Lur-Gisela bikoteak Naroa eta Arai izango dituzte aurrean lehen partidan abuztuaren 7an. Bigarren lehia uztailaren 14an izango da, Erika-Laura eta Tania-Oihana bikoteen artean. Munduko txapeldunak (Erika eta Arai) bertan izango dira, beraz, maila altua bermatuta egongo da.
Pilota eskolak
“Balioan jarri nahi dut, hain zuzen, herriko bi pilotari izango direla partaide, eta aurreko urteko giro bikaina sortzea niretzat ikaragarria litzatekela; herrian sortu zen ikusmira bi pilotari hauek ikustearekin zoragarria izan zen. Baina aipatu nahi dut ere pilota eskolen lana, gaur Hondarribin lehian aritzeko bi partaide baditugu hamarkadeetako lanarekin atzean. Eta etorkizunera begirakoan ere, herritarren partaidetza bermatu nahi badugu, urte osoko lan honen beharra goraipatu nahi dut”, adierazi du Igor Enparan alkateak.
