76 urteko gizon bat atxilotu dute, Santiago Bidean emakumeei sexu erasoak egitea egotzita
Segurtasun Sailak adierazi duenez gutxienez zazpi kasu berri antzeman dituzte lehen salaketatik abiatutako ikerketaren harira.
76 urteko gizon bat atxilotu du Ertzaintzak Hondarribian, Jaizkibel mendian Santiago Bidea egiten ari ziren emakume batzuei sexu erasoak egitea egotzita. Poliziak azaldu duenez, bidea bakarka egiten ari ziren emakumeak gelditzen zituen gizonak, eta haiekin hitz egin ondoren besarkada bat eskatzen zien. Besarkatzeko momentuan, baimenik gabeko musuak ematen zizkien, eta era berean ukituak egin.
Aurreko astean jasotako salaketa batek eragin du polizien mugimendua. Kaleko arropaz jantzitako agenteek gauzatu zuten atxiloketa, gizona denbora batez zelatatu ondoren. Ikerketak argitu du horrelako beste gutxienez zazpi kasu izan direla ekainetik hona. Halere, badira lekukotzak, esaten dutenak gizonak duela urtebetetik egiten zituela horrelakoak.
Era berean, Ertzaintzak adierazi du beste biktima posibleak ikertzen ari direla.
