Espainiako txapelketatik dominekin itzuli dira etxera
Emakumezkoen beteranoetan hirugarren postua lortu du elkarteak, eta haur mailako laukote mistoetan zilarrezko domina.
Asteburuan Sevillan izan dira Hondarribia Arraun Elkarteko hainbat arraunlari. Espainiako Arraun Olinpikoko txapelketa izan da bertan, Guadalquivirreko uretan. Aulki mugikorrean lehiatu dira denak, eta pare bat modalitatetan domina lortu dute hondarribiarrek.
Beteranoen mailan, bikotekako emakumezkoen tandan Itziar Uzkudunek eta Arantza Mariskalek brontzezko domina eraman zuten etxera. Alacanteko eta Sevillako bi bikote izan zituzten aurretik, baina hirugarren postu gozoa lortu zuten. Finalerdietan maila ona erakutsi zuen bikoteak, lehen postua bereganatuz, eta lehenago, kanporaketetan, 24 segundo atera zizkioten bigarren bikoteari, lehen postuan.
Haur mailan ere, domina. Zilarrezkoa kasu horretan. 4ko ontzi mistoan aritu ziren Aia Enparan Mendes, Haitz Goikoetxea Taberna, Xabi Lopez Ribes eta Malen Perez Oronoz. Club Nautico Sevillako. laukotetik soilik 2 segundotara iritsi ziren hondarribiarrak, atzekoak hiru segundotara utziz. Lehen errondan, kanporaketetan, bigarren postua lortu zuten ere, soilik bi segundo baino gutxiagoko atzerapenarekin. Ander Lopez Ribesek, aur mailan ere, lehen postua lortu zuen bakarkakoen B finalean. Kanporaketetan hirugarren gelditu ondoren, bigarren aukeran jokatu behar izan zuen, B finalera sailkatzeko.
