PSE-EEren ustez Mendeluko lezoia ez da proiektu aproposa
Uholdeek hainbateko kalteak eragin dituzte Mendelun, eta horiek beste modu batean kudeatu behar direla uste dute sozialistek.
Uholdeek hainbat buru hauste eragin dituzte azken urteetan herrian barrena. Mendeluko eta Jaizubiko bizilagunak izan dira ondorio latzenak izan dituztenak, baina Alameda inguruan eta Portua auzoan ere ikusi dira gora egindako urak. Horregatik, Foru Aldundiarekin batera, Hondarribiko Udalak hainbatetan adierazi du eskua hartzeko prestasun osoa duela, eta hainbat aldaketa egingo direla hori bera konpontzeko.
PSE-EE irtenbide horietako bati buruz mintzatu da: Mendeluko lezoia. Sozialisten ustez, lezoia ez da irtenbide bat, denbora baterakoa izango litzatekeelako, eta haien ustez gabezia asko dituen proiektua delako. “Proiektuak ez du uholdeek kaltetutako etxebizitzen babesa bermatzen. Bertako etxe eta baratze batzuek oraindik ere arazo berbera izango dute”, esan dute PSE-EEko kideek. Gehitu dute proiektua ez dagoela ongi azalduta, eta ez daudela argi ez hasiera ezta ere amaiera.
“Horrez gain, ez dago ingurumen-azterketarik eta karbono-aztarnaren ebaluaziorik. Alderdi hori kontuan hartu beharko litzateke beti, batez ere Dekretuan esaten denean behin-behineko jarduera dela eta, beraz, etorkizunean desmunta daitekeela”. Sozialistek uste dute badaudela irtenbide errazagoak eta merkeagoak, eta egoera hobe aztertzeko eskaera egin dute.
