Iker Piñeira eta Alain Oca Espainiako onenen artean
Asteburu honetan, 18 urtez azpiko Espainiako Txapelketan izan dira Castellonen, eta Super Amara BATek bi urrezko domin lortu ditu.
Asteburu honetan, 18 urtez azpiko Espainiako Txapelketa jokatu zuten Super Amara BATeko zortzi kirolarik, Castellonen. Iker Piñeirak eta Alain Ocak urrezko domina bana eskuratu zuten, 200 metrotan eta mailu jaurtiketan, hurrenez hurren. Beste behin ere, bidasoarrak Espainiako onenen artean izan dira. Urrezko dominez gain, beste atletek ere emaitza oso positiboak lortu dituzte.
Iker Piñeirak 21.20 segundoko marka pertsonala lortu zuen. Marka honi esker Rietin (Italia) jokatuko den Europako Txapelketarako txartela lortu du Piñeirak. Alain Oca ere nagusitasunez gailendu zen mailu jaurtiketan. Proba oso lehiatua izan zen, eta 64,57 metroko jaurtiketak balio izan zion txapeldun izateko.
Bestalde, Eñaaut Arburua eta Jon Andiano oso ondo aritu ziren 400 metro hesidunetako proban, Arburuak finalerako txartela eskuratu zuen eta azken proban seigarren izan zen. Naia Piquerrek 1.500 metroko finalerdietan amaitu zuen bere lehia, oso gutxigatik ezin izan zuen finalerako txartela lortu. Pablo Salinas eta Rafael Torralba 5.000 metro martxan aritu ziren, eta bederagatzigarren eta hamazazpigarren izan ziren, hurrenez hurren. Super Amara BATek disko jaurtiketan ere presentzia eduki zuen Olatz Elizasuri esker. Elizasuk ezin izan zuen finalerako txartela eskuratu, eta hamaikagarren postuan amaitu zuen jarduna.
Klubak atleta guztiak zoriondu ditu egindako txapelketagatik, eta ziurtatu dute kirolari hauek aurrera egiten jarraituko dutela eta datorren denboraldian zeresan handia emango dutela.
