Denboraldiko bigarren bandera lortu dute neskek
Zarautzen gailendu dira neskak, bertako taldea gailenduz. Gizonezkoen lehen traineruak laugarren postua lortu zuen atzo.
Euskotren Ligara itzuli nahi dute, eta, oraingoz, bide onean doaz. Atzo Zarautzen jokatutako I. Gesalaga Okelan bandera irabazi zuen Hondarribia Arraun Elkarteko emakumezkoen traineruak. Gizonezkoen lehen taldeak hobekuntza izan zuen larunbatetik igandera, eta KAE1 ligan bigarren traineruak erdiko postuei eutsi nahi die.
Pasaian irabazi zuen emakumezkoen traineruak lehen bandera, denboraldiko bigarren estropadan. Orain, Zarautzen izan da bigarrena, binakako erlojupekoan. Lehenengo ziabogan, hau da, estropada erdian, hirugarren postuan kokatu ziren berdezkoak. Kaiku eta Zarautz zituzten aurretik, segundo gutxitara, eta bigarren luzean pasa zituzten. Azkenean, 11:09ko denborarekin amaitu zuten, eta bigarrenak zarauztarrak izan ziren (11:14).
Sailkapen nagusiko lehenengo postuan mantentzen da emakumezkoen trainerua, Zarautz taldearekin berdinduta, 30 puntutara. Lau estropada egin dituzte oraingoz, eta bakoitzak bi irabazi ditu. Haien azpitik, 24 punturekin kokatzen da Kaiku. Camargon egingo dute hurrengo lehia, larunbatean. Eskifaiako fitxaketa berriek ederki ezagututako eremua izango da, Camargotik iritsi baitira aurten Hondarribira. Igandean, aldiz, Lekeition egongo dira.
Gizonezkoak, maila eutsi nahian
Gizonezkoen lehen traineruak ez zuen nahi zuen emaitza lortu larunbatean, Bilboko XVII. banderan. Bigarren txandan lehiatu ziren, eta bertan hirugarren postua lortu zuten, Getariaren eta Ondarroaren atzetik. Azkenean zazpigarrena izan zen Ama Guadalupekoa. Ezustekoa eman zuen Urdaibaik, eta denboraldiko bigarren estropada bereganatu zuen. Igandean, aldiz, Zierbenan izan ziren, eta Hondarribiak denborak hobetu zituen. Laugarren postuan izan zen, bigarren txandan bigarren postua lortu ondoren. Oriok irabazi zuen estropada. Euskolabel Ligako seigarren postuan kokatzen da Hondarribia. Larunbatean Castron izango dira, eta igandean Orion.
Bigarren trainerua Donibane Lohizunen izan zen larunbatean. Bigarren txandan lehiatu ziren, eta lehenengo ziaboga Lapurdiko taldearekin egin arren, hurrengo luzeetan atzean gelditu zen. Azkenean, txandako laugarren postua eta estropadako bederatzigarrenarekin itzuli ziren etxera. Igandean, aldiz, zortzigarrenak izan ziren Zarautzen. Sailkapen orokorrean zazpigarren dira, baina berdindutako liga da KAE1-a. Kaiku, adibidez, laugarren da, eta Hondarribitik 3 puntura dago soilik. Larunbatean Orion lehiatuko dira.
