Nagore Laffage gogoan izango dute datorren asteartean
Omenaldiaren ekitaldi hunkigarria Istillaga plazan egingo dute Emakumeen Etxearen kanpoaldean, 19:00etatik aurrera.
Aurten, 18 urte beteko dira Jose Diego Yllanesek Nagore Laffage Casasola hil zuenetik Iruñean. Irundarra jaiotzez, urtero legez omenaldia egingo diote datorren asteartean, hilak 7, Istillaga plazan. Emakumeen Etxearen atarian izango da omenaldia, haren oroitzapenak bizirik dirauela berresteko. Aurten ere, Asun Casasolak ez du hutsik egingo eta ekitaldian izango da.
Ekitaldia 19:00etan hasiko da, eta Cristina Laborda alkateak eta Maite Cortina Berdintasun eta LGTBIQ+ Eskubideen ordezkariak harrera instituzionala egingo dute. Ondoren, Patxi Perezek gidatuta, Asun Casasola ipuin lehiaketako kontakizunen irakurketa dramatizatua egingo dute. Asun Casasolaren jarduna aitortuko eta sustatuko dute, indarkeria matxista prebenitzeko egindako lan izugarriagatik. Ekitaldiari amaiera emateko Asun Casasolak hitza hartuko du.
Irungo omenaldiaz gain, atzo, hilak 1, Iruñeko Geltoki aretoan omenaldia egin zion Astelehen Lilak elkarteak. Aurtengoa berezia izan da, Nagore Laffageren heriotzaren 18. urteurrenaz gain, aurten hamarkada bat bete baita sanferminetan gertatutako talde bortxaketagatik. Iruñeko omenaldian hamaika artista izan dira, besteak beste, El Drogas, Motxila 21, Aurora Beltran, Kai Etxaniz, Yaya Bembe, Maite Mene eta Lola Rodriguez.
