Irungo ondare historikoa eta kulturala ezagutzeko hamaika jarduera
Gaur aurkeztu dute udako turismo kanpaina 'Gozatu-Ezagutu-Sentitu' lelopean, udan zehar hirian esperientziak bizitzeko.
Sanmartzialak amaituta, Irungo Udalak eta Bidasoa Bizirikek hasiera eman diote udari Luis Marianoko turismo bulegoan. Gaur aurkeztu dute udako jardueren turismo kanpaina, Gozatu-Ezagutu-Sentitu lelopean. Hiru ardatz horien baitan, hiriko ondare historikoa eta kulturala ezagutzeko jarduera ugari antolatuko dituzte hilabete hauetan zehar. Aurtengo protagonistak auzotarrak izango direla zehaztu dute, “hiriaren enbaxadore bilakatu dira”.
Aurtengo kanpainak hainbat berritasun izango ditu: Irugurutzetako labeetako bisita gidatuak, tren txikitoa eta terma erromatarren bisitak, besteak beste. Askotariko proposamenak eskainiko dizkiete, bai hiritarrei bai kanpotik datozenei ondare historikoa eta kulturala ezagutzeko.
Iazko udan arrakastatsuak izan diren jarduerak errepikatzea erabaki dute aurten. Hala nola, paseo gidatuak, bizikletaz egiteko ibilbideak, kayak irteerak edo naturaguneak ezagutzeko ibilbide interpretatiboak. “Kanpaina honetan gauza bat lortu nahi genuen, irundarrek berek erakustea, harro, hiriak dituen baliabide turistikoak”, azaldu dute aurkezpenean.
Bisita gidatuen artean, Zubiz zubi eta Irun, 2.000 urteko historia nabarmendu dituzte. Lehenengo proposamenari esker aukera izango dute Bidasoa ibaia ezagutzeko. Bi ordu baino gutxiagoko iraupena du bisitak eta Etorbidea zubitik Behobiako aduana zaharrerako bidea egingo dute uztaileko eta abuztuko ostegunetan. Bisita gidatuen prezioa 3 eurokoa izango da.
Bigarren proposamenak ere 2 ordu inguruko iraupena izango du, baina kasu honetan, hiriko zenbait toki historiko ezagutzeko aukera izango dute: Junkaleko plaza, San Juan plaza, Kale Nagusia, Pikoketa kalea, Colon pasealekua eta Zabaltza plaza. Esperientzia honi esker Junkaleko kanpandorrera igo ahalko dira. 25 minutuko iraupena izango du kanpandorrerako bisitak, hiru txandatan, 1,5 euroan.
Bestelako jardueren artean, Oiasso Museoak bi proposamen dituela azaldu du Aizpea Goenaga zuzendariak. Ostiraletan izango dira jarduera hauek: museoko aretoen eta terma erromatarren bisita eta Irun erromatarra ezagutzeko buelta.
