Martuteneko espetxea erre dute
Presoei elkartasuna emateko eta etxeratzea eskatzeko espetxeen erreketa egin dute Mosku plazan, eta bertan jendetza bildu da.
Martuteneko espetxea erre dute. San Joan egunaren bezperan sua da protagonista, eta herri bakoitzak hainbat su antolatzen ditu sentipen txarrak uxatzeko. Irunen San Juan plazako ekitaldi ofizialaz gain, Mosku plazan presoen senide eta lagunek espetxearen erreketaren ekitaldia antolatzen dute urtero. Aurten ere, jendetza bildu da suaren inguruan. Dozenaka haurrek ikasturteko apunteak eta bestelako materialak sutara bota dituzte, eta Martuteneko espetxearen maketa kiskalita gelditu da.
21:45ean hasita, txalaparta soinuek hasiera eman diote ekitaldiari. Kemen Dantza Taldeko dantzariek agurra dantzatu diete presoen senide eta lagunei, baita zapi gorria jantzi ere. Ekitaldi Euskal preso eta iheslari guztiak izan dituzte gogoan, bereziki, Irungo biak: Iratxe Sorzabal eta Fermin Vila Fermo.
“Azken urtean aurrerapausoak eman arren, oraindik ere salbuespen legeak indarrean jarraitzen du”, gogoratu dute. Argi eta garbi adierazi dute salbuespen legeak betirako amaitu behar direla. “Iratxe eta Fermo gurekin nahi ditugu, IIrunen, Moskun eta aske”.
Batasuna kanta abestuta amaiera eman diote dantzarien kalejirari, eta jarraian sua piztu dute. “Presoak etxera” edota “Espetxeak apurtu” aldarriak lau haizetara zabaldu dituzte.
Hona hemen HITZAk ekitaldian ateratako argazki sorta.
