Harro egoteko arrazoiak badaudelako
LGTBIQ+ Harrotasunaren Nazioarteko Egunaren harira, hainbat egitasmo antolatu dituzte. Haien artean, Monika Weberrek emango du aurtengo preogoia.
Harrotasuna. Hori bera ospatuko dute ostiraletik aurrera Hondarribian. LGTBIQ+ pertsonen eskubideen alde, askotariko programazioa antolatu du udalak, Berdintasun sailaren bitartez.
Egun potoloa ostiralean izan arren, gaurtik hilaren 30era arte, Francis erakusketa egongo da ikusgarri Arma Plazan. “Erakusketak memoria historikoa eta sexu- zein genero-aniztasunaren inguruko hausnarketa sustatzen ditu, eta Euskal Herriko LGTBIQ+ mugimenduaren historiako pasarte esanguratsu bat ekartzen du gogora”, adierazi du udalak.
Pasarte hori 1979ko ekainaren 10ean gertatutakoa izan zen, Errenterian, non poliziak tiroz hil zuen. Garaiko mugarri bihurtu zen, eta Euskal Herriko LGTBIQ+ eskubideen borrokan abiapuntu garrantzitsua izan zen Francisen hilketa.
Ostiralean, goizean, gazteek hartuko dute protagonismoa. Saindua gaztelekuan Kode Kimit jolas tailerra egingo dute. “Jarduera honek gazteen artean berdintasuna, errespetua eta aniztasunarekiko sentsibilizazioa lantzea du helburu, ikuspegi ludiko eta parte-hartzaile baten bidez”, esan du udalak. Nerabezaroan dauden gazteentzako gai sentsiblea izan daiteke LGTBIQ+ eskubideena, eta horregatik, gertutasunetik egindako lanketa izango da.
Pregoia Kasinoan
Ekitaldi nagusia bandera jartzearekin egingo da. Aurten, Monika Weberrek emango du pregoia, Kasino Zaharrean, Berdintasun Mahaik proposatuta. Jawata Anti-DJ bezala ezagutzen da Weber, eta herrian hainbatetan izan da haren musika jartzen. Pregoia ondoren, DJ La Fulanak girotuko du Kasino Zaharra.
Monika Weberrekin elkarrizketa bat kaleratuko du ostiralean HITZAk.
Igandean, Polborinean film laburren saioa eskainiko da, Zinegoaren (Bilboko LGTBIQ+ Zinema eta Arte Eszenikoen Nazioarteko jaialdia) eskutik. 19:00etan izango da, eta tiketak Arma Plazan edota Kutxabanken atarian lortu daitezke.
