EAJk Zezen Plazako lurpeko aparkalekuan ekiteko eskatu du
Aurreko astean Javier Ugarteko aparkalekuaren proiektua aurrera eramateko eskakizuna egin zuten, baina Abotsanitzen iragarkiaren ondoren, Zezen Plazakoa jarri dute erdigunean.
EAJk positibotzat jo du Zezen Plazako lurpeko aparkalekuaren bideragarritasunaren albistea, baina ekiteko eskatu dio udalari. Jeltzaleek aurreko astean Javier Ugarte azpiko aparkalekuan aurrerapenak egiteko eskakizuna egin zuten, udal gobernuari zuzenduta, baina oraingoan, Zezen Plazako bideragarritasun planaren berri jakin eta gero, azken horretan ekiteko eskatu diete. “Urteak badaramatzate proposamen hau defendatzen, azken urteotan egindako azterketek bideragarria dela ondorioztatzen badute eta Hondarribirako irtenbiderik onena dela uste badute, galdera argia da: zergatik ez da gehiago aurreratu gobernuan daramatzaten hiru urte hauetan?”.
EAJk adierazi du ez dela beharrezkoa HAPOaren zain gelditzea. Horrez gain, gogorarazi nahi izan dute soilik zundaketak egin direla, eta oraindik bideragarritasun plan osoa ez dela egin, hala nola azterketa ekonomikoak, aurreproiektuak eta aurrekontu estimazioak.
