Alaine Agerralde, 20 urtez azpiko onenen artean
Perun jokatutako Txapelketa Iberoamerikarrean bi zilar eskuratu ditu bidasoarrak, 400 metro hesidunetan eta 4x400 erreleboetan.
Bikaina. Ez dago Alaine Agerralderen denboraldia deskribatzeko hitz hoberik. Asteburu honetan berriro ere distira egin du, eta nola gainera. Liman (Peru) jokatutako 20 urtez azpiko Txapelketa Iberoamerikarrean bi zilar eskuratu ditu. Egun batzuk izan da Perun eta izugarrizkoa izan da bertan bizitakoa.
Larunbatean, hilak 20, 400 metro hesidunetan lehiatu zen. Finalerdietan garaipen estua lortu zuen, eta finalerako txartela lortu zuen denbora onena markatuta. Atzo, hilak 21, finala jokatu zuen eta proba honetan bigarrena izan zen, finalerdietako marka hobetuta. Erreleboetan ere abila da, eta 4×400 errelebo mistoen taldearekin ezin hobeto aritu zen. Agerraldek azken 400 metroak egin zituen, eta atzetik aurrera eginda postuak berreskuratzea lortu zuen. Helmugan bigarrenak izan ziren. Bi diziplinatan egindako lanak sekulako saria eduki du: bi zilarrezko domina. Aurtengoa ez da bere lehenengo parte hartzea izan, laugarrena baizik.
Etxera itzulita, Super Amara BAT taldeak hitzordu garrantzitsua izan du asteburuan: Gipuzkoako Txapelketa. Bidasoar ugari izan ziren Arrasaten hainbat diziplinatan parte hartzen. Guztira, urrezko bi domina, zilarrezko hiru eta sei brontzezko domina eskuratu zituzten bidasoarrek. Hamaika domina hauez gain, taldekako sailkapenean bigarrenak izan ziren gizonezkoetan zein emakumezkoetan.
400 metroetan Alazne Garrido Gipuzkoako Txapelduna izan zen, inoiz lortutako marka onena lortu zuen; Luken Aizpuruak, berriz, lesio batetik itzuli ondoren, luzeran lehenengoa izan zen. Naia Piquer, Mario Estanga eta Izaro Romero garaipena esku-eskura izan zuten, baina bigarren postuarekin konformatu behar izan ziren 1.500 metroetan, pertikan eta altueran, hurrenez hurren. Bidasoarrak podimueko hiru mailatan izan ziren, baita hirugarrenean ere. Noa Garciak bina brontzezko domina eskuratu zituen luzeran eta altueran; honako kirolari hauek ere hirugarrenak izan ziren euren diziplinan: Markel Garrancho, 200 metroetan; Junkal Etchegaray, 800 metroetan; Julen Mendoza, 1.500 metroetan; eta Iñigo Lozano, 400 metroetan.
San Martzialgo Igoerarako zapatilak prest
Larunbat honetan, hilak 27, San Martzialgo igoera egingo dute ehunka korrikalarik, Urdanibia plazatik hasita, San Martzialgo ermitaraino. Ostegunetik aurrera, tenperaturek behera egingo dute eta hortaz, korrika egitea plan bikaina izango da larunbaterako. Dagoeneko ehun dortsalen langa gainditu dute, eta aurtengoa edizio jendetsuena izatea espero dute antolatzaileek.
Hala ere, oraindik ere izen emateen epea zabalik dago Kirolprobak webgunean. Ostiral eguerdira bitarte, 12 euroan izango dira dortsalak; eta hortik aurrera, alegia, igandera arte; 16 euroan. Antolatzaileek gogorarazi dute oraindik ere, San Martzialgo eta Guadalupeko igoera egiteko bonua salgai dagoela, 18 euroan.
