Txosnek eremu segurua direla defendatu dute
Pasa den ostiralean ireki zituzten txosnak, eta lehen bi egunetan bi eraso izan ziren. Gune segurua direla aldarrikatu dute, eta 27ko herri bazkaria oroitarazi nahi izan dute.
Duela aste bat ireki zituzten Irungo txosnak. Ostiralean eta larunbatean ireki zituzten, eta bi gauetan, bi eraso izan ziren txosna gunean. Horren aurrean, sei txosnek adierazpen bateratua egin zuten atzo, erasoak gaitzesten eta haien arteko elkartasuna erakusten.
“Jaiak guztionak dira, eta guztion artean zaindu nahi ditugu”, horrela hasi zuten adierazpena. Argi utzi nahi izan dute, bi eraso izan arren, espazio seguru bat dela txosnagunea. “Gure eremuan ez dugu inolako erasorik onartuko. Ez matxista, LGTBIQ+fobo, arrazista, faxista edo edozein motako indarkeriazko jarrerarik”. Eraso horien aurrean, adierazi dute txosnak laguntza eskaintzeko daudela, eta horretarako soilik barrara jo eta bertan eskatzea dela prozedura. “Eraso bat jasan edo ikusi baduzu, jo ezazue berehala edozein txosnetako barrara”.
Txosnek haien jarduera antolatzen dute, eta horren atzean asteetako lana ezkutatzen da. “Jarduerak aurrera ateratzen diren arren, Irungo Udalaren trabarekin topatu gara maiz, eta beste egitasmo ugari ezin izan dira aurrera atera. Ez da aurtengo kontua, luze datorren arazoa baizik”, azaldu zuten. Salaketa publiko bat egin nahi izan zuten, esanez Irungo Udalak txosnaguneko eragileen proposamenak ukatzen dituela. “Kaleak eta jaiak denonak dira, irundarronak, eta ez udalarenak. Jai eredu burokratiko honetatik aldendu eta herriko eragileon iniziatiba baztertzeari uztea aldarrikatu nahi dugu”.
27an, bazkaria Moskun
Erasoak gaitzesteaz gain, ekainaren 27ko bazkaria oroitarazi nahi izan dute. “300 pertsonentzako otordua izango dugu 27an, hemen plazan bertan”, adierazi zuten txosnetako ordezkariek. Menua errusiar entsaladilla, albondigak eta postrea izango da. Aukera beganoa ere izango dute. 12 eurotan salduko dituzte tiketak, txosnetan bertan. Ondoren, koadrilen arteko herri kirol proba egingo dute, eta arratsaldean eta gauean zehar, musikaz beteko da plaza.
