Osasun Bidasoak konponbidearen zain jarraitzen du
Pasa den larunbatean, milaka lagun bildu ziren Irunen eskualdeko egoera salatzeko; herri plataformak mobilizazioekin jarraitzeko asmoa du.
Urtebete baino gehiago pasa da, eta oraindik ere, eskualdeko osasungintzak ez du irtenbiderik. Azken hilabeteotan, “domino efektua” bizitzen ari dira herritarrak. Duela urtebete larrialdi pediatrikoak itxi zituzten, eta berriki Irungo Erdialdeko Etengabeko Arreta Guneko (EAG) profesionalek ere bertako larrialdi zerbitzua kolapsatzeko arriskuan dagoela adierazi dute. Osasun Bidasoa herri plataformak adierazi du irtenbiderik egon ezean, udako etenaldiaren ostean mobilizazioekin jarraituko dute.
Osasun Bidasoak eskerrak eman nahi dizkie larunbateko mobilizazioan parte hartzeagatik, baita urtean zehar emandako bultzadagatik. Larunbateko mobilizazioan, eskualdeko alkateak eta udaletan ordezkaritza duten alderdi politiko gehienetako ordezkariak bertaratu ziren. Herritarrak, eta batez ere, bertako mediku eta bestelako langileak nekatuta daudela adierazi dute, enegarrenez.
Beste behin ere, Osasun Bidasoak Eusko Jaurlaritzako Osasun Sailari neurri zehatzak hartzea eskatu dio, “hitz hutsak eta bete gabeko promesak alde batera utzita”. “Egungo arazoei irtenbidea emateko ezinbestekoa da Osakidetzak orain arteko politikak aldatzea eta osasungintzaren kudeaketan norabidea aldatzea”, eskatu du plataformak.
Iazko irailean, Osasun Bidasoako ordezkariek Pedro Morrondo doktorearekin, Bidasoa ESIko gerentea izendatu berritan, azken bilera egin zuten. “Orduan pazientzia eskatu zien herritarrei, baina denbora igaro da eta hobekuntzak ez dira bete”.
“Gauzak ez dutenean behar bezala funtzionatzen, eta arazoek urteetan irauten dutenean, arduradunak berritzea ezinbestekoa izaten da egoera iraultzeko”, amaitu dute komunikatua.
