Zezen Plazako lurpeko aparkalekuaren bideragarritasuna jaso du udalak
Georadarraren bidez eta zundaketa arkeologikoen bidez, baieztatu dute posiblea dela Zezen Plazan aparkalekua eraikitzea. HAPOarekin batera onartuko lukete proiektua.
Abotsanitzek zabaldutako irudia, adimen artifizialarekin egina. Aparkalekuen aferari irtenbide bat emateko nahian, hainbat mugimendu egin dituzte udal taldeek aste honetan. EAJ izan zen lehena, Javier Ugarteko lurpeko aparkalekua abian jartzeko eskatzen. Orain, Abotsanitzek adierazi du Zezen Plazako lurpeko aparkalekua teknikoki bideragarria dela, eta epe ertain batean hasiko direla proiektua garatzen.
Abotsanitzek haien sareetan zabaldutako bideo baten bidez, adierazi du Zezen Plazan egindako bideragarritasun planek baiezkoa eman dutela. “Zezen Plazan georadarraren eta zundaketa arkeologikoaren bidez azterketak egin dira, eta aste honetan eman digute bideragarritasunaren baiezkoa”, azaldu du Iker de La Linde Abotsanitzeko kideak. Aurreko legealdietan, EAJk osatutako udal gobernuak ez zuen begi onekin ikusten Zezen Plazako proiektua, Alde Zaharraren eta harresien ondoan egonik, bertan aztarna arkeologikoak egongo zirela ustez, hala nola, harresiaren kontraeskarpak, fosoaren beste aldean eraikitzen zirenak.
Horregatik, EAJtik Donostia kaleko eta Javier Ugarteko aparkalekuak sustatu nahi izan dituzte, baina Abotsanitzek aspalditik eskatu izan du Zezen Plazako lurpeko aparkalekuaren obra gauzatzea, zehazki, 2017. urtetik. HAPOarekin batera onartuko da lurpeko aparkalekua, eta hori bera aurten onartzekoa denez, epe ertainera jarriko liteke martxan aparkalekua eraikitzeko proiektua.
