Alaine Agerralde Peruko Txapelketa Iberoamerikarrean izango da
Denboraldi bikaina egin ostean, Liman egingo den 20 urtez azpiko txapelketan izango da 400 metro hesidunetan lehiatzen.
Atletismoak ez du etenik. Asteburu honetan, bi hitzordu nagusi izango dituzte Super Amara BAT taldeko kirolariek. Batetik, Alaine Agerraldek Perun 20 urtez azpiko Txapelketa Iberoamerikarrean parte hartuko du, bihartik, hilak 19, igandera bitarte. Bestalde, Arrasaten Gipuzkoako Txapelketa absolutua izango dute taldeko atleta ugarik. Larunbatean eta igandean hainbat diziplinetako probak izango dituzte.
Alaine Agerraldek aurten egindako denboraldia bikaina izan da, eta hilabeteotako esfortzuek merezitako saria eduki dute. Dagoeneko Liman (Peru) dago, bihartik igandera bitarte izango den lehiaketa prestatzen. 400 metro hesidunetan parte hartuko du, eta Limako txapelketa nazioartean ere esperientzia pilatzekoa baliagarria izango dela adierazi du taldeak.
Denboraldian zehar bere marka pertsonala hobetzea lortu du hainbat diziplinatan. Liman lehiatuko den proban, esaterako, 58.97 segundotan ezarri zuen marka. Bestalde, 4×400 erreleboetan ere lehiatu izan da, eta diziplina honetan ere sekulakoak lortu ditu: Espainiako eta Euskadiko errekorra ezarri zuen beste hiru taldekideekin batera.
Emaitza hauek guztiek txartela eman diote Iberoamerikarrera joateko. Espainiatik, guztira, 30 atleta joango dira, hain zuzen, 15 gizon eta 15 emakume. Eta 15 horietako bat Alaine Agerralde izango da.
27. Txingudi Korrikarako izen ematea irekita
Asteburu honetan izango diren txapelketaz gain, datorren urrian Txingudi Korrikaren 27. ediziorako izen emateko epea irekita dagoela iragarri dute. Aurten ere, txikienentzako lasterketak eta 10K lasterketa antolatuko dituzte, urriaren 3an eta 4an, hurrenez hurren.
Larunbatean, Stadium Galeko zelai txikia korrikalari gazteez beteko da. 2013tik 2025era bitarte jaiotako haurren txanda izango da. Bertan, parte hartzeko izen ematea doakoa izango da, eta dagoeneko Kirolprobak.com webgunearen bitartez eman dezakete izena.
Igandean, berriz, 10 kilometroko lasterketa egingo dute Hondarribiako, Hendaiako eta Irungo kaleetatik barrena. Lasterketa honetarako ere, izen emateak irekita daude Kirolprobak atarian. Izen emateko epea ireki eta ordu gutxira lehenengo 100 dortsalak agortu ziren. Lehenengo 300 dortsalak saldu arte, 16 euroko promozioa aktibatu dute. Korrikalariez gain, handbike eta gurpil-aulki modalitateetarako izen emateak ere zabalik dira.
