Super Amara BATeko emakumeak Espainiako zazpigarrenak izan dira
Gizonezkoen taldea nagusitasunez gailendu zen Durangon, eta Lehen Mailan jarraituko dute datorren denboraldian.
Asteburu bikaina izan da Super Amara BATeko atletentzat. Emakumezkoek eta gizonezkoek helburu bana zituzten Kluben Liga Nazionalaren azken jardunaldirako, eta bi taldeek aurreikusitako helburuak bete dituzte. Eta nola bete, gainera. Honela, Super Amara BAT Espainiako talde garrantzitsuenetarikoa dela erakutsi dute aurtengo Kluben Liga Nazionalean.
Emakumezkoen taldeak historia egin du. Hirugarren urtez, Espainiako zortzi talde onenen artean izan da. Eta ez hori bakarrik, Espainiako zazpigarrenak izan dira, klubak inoiz lortu duen posturik onena lortuta. “Emakumezkoen denboraldia historikoa izan da”, adierazi du klubak. Aurreko bi urteetan finalera sailkatzeko txartela eskuratu zuten, baina finalean zortizgarrenak izan ziren. Aurten, ordea, zazpigarrenak izan dira seigarrenarekin berdinduta eta laugarren taldearengandik soilik bi puntura.
Hirugarren jardunaldia Iruñean jokatu zuten, eta bertan Douae Ouboukirrek nagusitasunez irabazi zuen 3.000 metroko oztopo lasterketa. Lehenengo izateaz gain, Espainiako hamaisegarren marka historiko onena lortu zuen. 4×400 erreleboetan, bigarrenak izan ziren, taldeko marka onena ezarrita. Aslim Quiala eta Olaia Becerril hirugarrenak izan ziren pertikan eta luzeran, hurrenez hurren. Beste taldekideak ere podiumetik kanpo egonda ere, emaitza onak eskuratu zituzten sailkapen orokorrean balio handia izan zutela.
Beste urte batez Lehen Mailan
Emakumezkoen taldeak Ohorezko Mailan denboraldi aparta egin badu ere, gizonezkoen taldea ere kontent da aurten lortutakoarekin. Helburua mailari eustea zen, eta Durangon jokatuko hirugarren eta azken jardunaldian nagusi izan ziren. Larunbatean lortutako puntuak balio handikoak izan ziren, eta horiei esker, bederatzigarrenak izan dira.
Guztira bost garaipen lortu zituzten. Abiadurazko probetan, Alejandro Per eta Ander Aramendi iristen lehenak izan ziren 200 metroko eta 3.000 metroko probetan, hurrenez hurren; bestalde, Iker Arozena ere nagusi izan zen luzerako proban. Jaurtiketetan bi garaipen eskuratu zituzten bidasoarrek: Alejandro Esteban jabalinan eta Bruno Cagigos diskoan.
Aritz Zuazo altueran eta Mario Estanga pertikan podiumeko bigarren koskan izan ziren. Eta azkenik, lau hirugarren postu lortu zituzten Super Amara BAT taldeko gizonek. Iker Piñeira 100 metrotan, Eñaut Arburua 400 metro hesietan eta Gonzalo Tamayo pisuan hirugarrenak izateaz gain, marka pertsonala hobetzea lortu zuten hirurek. Emakumezkoetan bezala, 4×400 erreleboetan emaitza positiboa izan zuen gizonezkoen taldeak; nahiz eta, kasu honetan hirugarrenak izan, klubeko emaitzarik onena lortu zuten.
