EAJk Javier Ugarteko lurpeko aparkalekua abian jartzeko eskaera egin du
Jeltzaleek diote borondate politikoa dela horrelako proiektu bat aurrera eramateko beharrezko tresna.
Aparkaleku falta nabaria sumatzen dute Hondarribiko herritarrek, eta askotan adierazi izan ohi diote hori bera Hondarribiko Udalari. Duela bi urte itxi zuten Biteri eskola pareko aparkalekua, bertan Presa etxeak egiteko, eta horrek eskaintza gutxitu zuen, eskaria urtero handitzen den garaietan. Horregatik, udalak askotan errepikatu du aparkalekuen afera gauza garrantzitsua dela herrian. Horren harira mintzatu da EAJ, eta esan dute orain dela garaia Javier Ugarte azpiko aparkalekua egiteari ekiteko momentua.
Udan milaka auto sartzen dira Hondarribian. Askok hondartzarako bidea hartzen dute, baina beste hainbatek ikusten duten lehen aparkalekuan uzten dute haien ibilgailua. Horrek, arazoak sortzen ditu bertakoentzat, itzuli amaigabeak eginez leku baten bila. “EAJ-PNVren ustez, iritsi da arautzetik irtenbide berriak sortzera igarotzeko unea, eta dauden aparkaleku aukerak handitzea ahalbidetuko duten proiektuetan lanean hastekoa”, adierazi dute jeltzaleek.
EAJren eskaera kreditu aldaketa batean partida ekonomiko bat txertatzea izan da, Javier Ugarteko lurpeko aparkalekua garatzeko beharrezkoak diren aurretiazko lanak abian jartzeko. “Proposamena orain hastea da, azterketa teknikoak eta aurreproiektua sustatuz, azpiegituraren bideragarritasuna aztertu eta haren ezaugarriak zehazteko”.
Jeltzaleek diote aurrera egiteko beharrezkoena “ez direla baldintza teknikoak, borondate politikoa baizik”.
