Gorka Alvarez izango da Irungo EAJko alkategaia
Alderdi jeltzaleak Alvarezengan konfiatuko du hurrengo urteko hauteskundeetan, alderdiaren aurpegia izateko.
Irungo EAJk pauso handi bat eman du 2027ko hauteskundeei begira. Gorka Alvarez Aranburu izendatu dute alderdi jeltzalearen ordezkari, hau da, alkategai. EAJko bozeramaile da Alvarez 2024tik, eta bigarren alkateorde izendatu zuten. Horrez gain, Obrak, Mantentze eta Azpiegiturak eta Giza Eskubideak, Memoria Demokratikoa eta Lankidetza arloak kudeatzen ditu ordutik. “Irun une erabakigarrian dago, hainbat proiektu estrategikorekin, eta proiektu horiek zehazten jarraitu behar dira hiri hobea eraikitzen jarraitzeko. Irungo EAJ-PNVk ia urte eta erdi darama Udal Gobernuan, irundarren egunerokotasuna kudeatzeko gai garela erakutsiz”, adierazi du Alvarezek.
“Guztion artean ahalik eta Irun onena eraiki behar dugu, eta horretan aritu gara beti, orain gaude eta horretan jarraituko dugu. Hilabete hauetan herritarrei entzuten jarraitzea dagokigu, pertsona guztiak partaide sentituko diren hiri-proiektu bat eskaintzeko”. Gorka Álvarez Aranburu, Enpresa Zientzietan diplomatua, EAJ-PNVren Diputatuen Kongresuko Euskal Talde Parlamentarioko laguntzailea izan zen 2008 eta 2015 artean eta, ondoren, 2015 eta 2017 artean, Isabel Sánchez Robles orduko Gizarte Ekintzako Foru Diputatuaren laguntzailea izan zen. Irungo Udalean bigarren alkateordetza izan aurretik (2025eko otsailetik), Eusko Jaurlaritzaren Kanpoko Euskal Komunitatearen zuzendaria izan zen (2017-2025).
