Nagore Otañoren omenezko Irun Hiria Sari Nagusia egingo dute asteburu honetan, Jaizubian
Aurtengoa 26. edizioa izango da, eta guztira 150 zaldizko eta amazona baino gehiagok parte hartuko dute bihartik igandera bitarte.
Sanmartzialekin batera iritsi da aurtengo Nagore Otañoren Oroimenezko Irun Hiria Sari Nagusia. Asteburu honetan, hilaren 12tik 14ra, zaldiketaren bi hitzordu nagusi izango dira hirian: ohikoa den Irun Hiria Sari Nagusia eta Euskadiko Oztopo Jauzi Txapelketa. San Pedro eta San Martzial jaien egitarauaren ekitaldia da, eta herritarrei Jaizubia Zaldiketa Eskolara hurbiltzeko dei egin diete.
2007. urtera arte San Martzial Derbia, Irun Hiria Sari Nagusia izenez, ezaguna zen; baina, 2008an Lasarteko hipodromoan Nagore Otaño zaldizkoak izandako istripuaren ondorioz, Nagore Otañoren Oroimenezko Irun Hiria Sari Nagusia izatera pasa zen txapelketa.
Aurtengo txapelketan, Ipar Euskal Herritik, Arabatik, Bizkaitik eta Gipuzkoatik etorritako 150 zaldizko eta amazona baino gehiago izango dira hiru egunetan hainbat probatan lehiatzen. Aurten gainera, Euskadiko onenak izango dira.
Goizeko 09:00etan hasita, 0,65 metrotik hasita 1,30 metrora arteko jauziak egin beharko dituzte Sari Nagusian. Antolatzaileek diotenez, oso zorrotzak eta ikusgarriak izango dira probak.
Parte hartzaileen eta ikusleen etorrera errazteko, Urdanibia Jauregiaren eta Txingudi Ikastolan apakalekuak jarriko dituzte bihar arratsaldetik igandera bitarte.
