Alde Zaharra, berriro ere Erdi Aroan
Asteburuan izango da Hondarribiko Erdi Aroko azoka, eta giroz eta biziz beteko dira Alde Zaharreko plaza eta kale estuak. Argazki Lehiaketa egingo dute beste urte batez.
X. mendera bidaiatuko dute hondarribiarrek asteburu honetan. Alde Zaharreko kaleak musikaz, usainez eta giroz beteko dira, urtero moduan Erdi Aroko azoka egingo dute eta. Artisauez beteko dira kale estuak, baina izango da ere ongi pasatzeko aukera, betiko jokuekin edo kaleak zeharkatuko dituzte musikari eta artistekin. 80 postu izango dira zehazki, bertaratutakoek produktu goxoak eta landuak eros ditzaten.
Beti bezala, larunbatean hasiko da azoka, eta iganderaino iraungo du. Hainbat herritarrek badituzte haien begiko postuak, urtero bisitatzen dituztenak. Hala nola Gipuzkoa Plazan espezieak saltzen dituen postua, Obispo plaza inguruan janari arabiarra eskaintzen duena, edo nola ez, almendra garrapiñatuak dozenaka dituena.
Arma Plazan, urtero bezala, errementariak jarriko dira, ezpatak eta tresnak nola egiten dituzten erakutsiz, sua eta ura erabiliz, garaian egiten zen moduan. Etxeko txikien gustukoenetarikoa izaten da labirintoa, eta aurten, berriro ere bertan izango dute. Baluartean jarri dute zehazki, beheko aldean.
Hainbat egitasmo prestatu dira astebururako. Tailerrak egingo dituzte, hala nola burdinolan, beira puztua eta tradiziozko jokoak. Eta nola ez, nork ez dauka Erdi Aroko azokan egindako buztinezko pieza bat etxean? Bertan izango da buztin tailerra aurten ere. Xakea, arku tiraketa, Jaizubiako pottokak, txotxongiloak, erraldoiak… zaila izango da asteburuan aspertzea.
Argazki lehiaketa
Postuez eta programazioaz gain, Erdi Aroko argazki lehiaketa jarri du martxan beste urte batez udalak. “Ekimenaren helburua da ekainaren 13an eta 14an Alde Zaharrean egingo den azokaren giroa, kolorea eta berezitasuna irudi bidez jasotzea”, adierazi du udalak. Argazkiak 20×30 zentimetrokoak izan beharko dira, markorik gabe. “Lehiaketaren oinarrietan jasotzen den bezala, irudiek erabilera ez-sexista, inklusiboa eta ez-arrazista bermatu beharko dute, eta pertsonak agertzen diren kasuetan emakumeen eta gizonen presentzia modu orekatuan eta estereotiporik gabe islatu beharko da”.
