EAJren balorazio baikorra Pasaiako Portuak eta aireportuak EBOH zerga ordainduko dutelako
EAJk positiboki baloratu du zergaren onarpena, "udalerrietako tokiko ogasun finantzaketan modu bidezkoagoan laguntzeko" neurria izango delako.
Loreto Osa (Pasaia), Elixabete Murua (Errenteria) Eider Mendoza (diputatu nagusia) Itziar Agirre (Ogasun diputatua) Maria Serrano (Hondarribia) eta Laura Martinez (Lezo), gaur, batzar nagusietan.EAJ Pasaiako Portuak eta Hondarribiko aireportuak Ezaugarri Bereziko Ondasun Higiezinen (EBOH euskaraz, BICE gaztelaniaz) zerga ordaintze hasiko dira. Gaurko Gipuzkoako Batzar Nagusietako oso bilkuran hartu da erabaki hori. EAJk oso baikor baloratu du onarpena, “udalerrietako tokiko ogasun finantzaketan modu bidezkoagoan laguntzeko” neurria izango delako: “Onarpen honek berriro erakusten du udalerrien interesak defendatzeko eta haien autonomia finantzarioa indartzeko orduan alderdi jeltzaleak irtenbide zehatz eta eraginkorrak eskaintzen dituela erakundeetatik. Azpiegitura horiek jarduera ekonomikoa sortzen dute inguruarentzat eta lurralde osoarentzat, baina, aldi berean, hirigintza, ingurumen eta mugikortasun arloan eragin esanguratsuak ere eragiten dituzte”. Eragin horiengatik ordaintzen hasiko dira portua eta aireportua zerga.
Errenteriako, Pasaiako eta Lezoko EAJren udal taldeetako bozeramaileek, Elixabete Muruak, Loreto Osak eta Laura Martinezek, eta Hondarribiko bozeramaile jeltzale Maria Serranok zuzenean jarraitu dute osoko bilkura. Horren ondoren, Eider Mendoza diputatu nagusiarekin eta Itziar Agirre Ogasun eta Finantza foru diputatuarekin bildu dira erabakiaren gaineko balorazioa egiteko. Goialdeko argazkian daude EAJren ordezkari horiek guztiak.
Azaldu dute, EBOH udalerriek jasoko dutela Ondasun Higiezinen Zergaren gaineko foru araua onartu delako, eta beraz, udalek zerga horren bitartez jasoko dute EBOHtik eratorritako diru kopurua betiere zerga horren araudian egokitzapenak eginda. “Neurri honek afekzioa jasaten duten udalerriek aspaldidanik egindako aldarrikapen bati erantzuten dio, eta Gipuzkoako Foru Aldundiak XXI. mendeko lurralde-errealitatera egokitu gabe geratu zen araudi fiskala eguneratzeko hartutako konpromisoaren emaitza da. Beste behin ere, EAJk erakutsi du udalerrietan pentsatzen duen alderdia dela, haien beharrak entzuten dituena eta herritarrei zerbitzu publiko hobeak eskaintzeko baliabide eta gaitasun handiagoa izan dezaten lanean aritzen dena. Adierazpenetara mugatzen direnen aurrean, guk tokiko finantzaketa hobetzen eta udalerriak indartzen dituzten neurri zehatzak bultzatzen ditugu”.
Neurria onartuta, erakundeen arteko lankidetzan jarri dute azpimarra jeltzaleek, “hartutako konpromisoak betetzean eta herritarrentzat baliagarriak diren irtenbideak bilatzean oinarritutako gobernatzeko moduaren beste adibide bat da”.
