Super Amara BAT, dominaz beteriko asteburua
16 urtez azpiko Espainiako Txapelketa eta Euskadiko Txapelketan 18 domina eskuratu dituzte; eta Irungo 5K lasterketan jendetza izan da.
Ekitaldiz beteriko larunbata eta igandea izan da Bidasoa Atletiko taldearentzat. Super Amara BATeko atleta ugari lehiaketa garrantzitsuak izan dituzte asteburu honetan, eta beste behin ere egindako lanak merezitako saria izan du.
La Nucian (Alakant, Herrialde Katalanak), 16 urtez azpiko Espainiako Txapelketa jokatu dute Imad Zuhaitz Urrutiak, Adur Errazquinek eta Nora Gonzalezek. Hirurek lan ona egin dute, eta bakoitzak bere marka pertsonala hobetzea lortu du. Imad Zuhaitz Urrutia Espainiako txapeldun izan da jauzi hirukoitzean, 14.11 metroko jauzia lortuta. Adur Errazquinek zilarrezko domina eskuratu zuen 1.500 metroko oztopo lasterketan. Nora Gonzalez lehen aldiz izan da Espainiako Txapelketan, eta lehen aldia izan arren, finaletik segundu gutxira gelditu zen.
Durangon, Euskadiko Txapelketan ere sekulako emaitzak lortu zituzten bidasoarrek, guztira 16 domina eskuratuta. Eñaut Arburua, 400 metroetan; Iker Arozena, 100 metroetan; Ander Aramendi, 800 metroetan; Goizane Garcia, pisuan eta mailuan; Juan Errandonea jauzi hirukoitzean; eta Mikel Aramendi, 3.000 metro oztopoetan lehenak izan ziren. Sei zilarrezko domina eskuratu zituzten honako kirolariek: Julen Mendozak, 3.000 metro oztopoetan; Iker Piñeirak, 200 metroetan; Alaine Aguerralde, 400 metro hesietan; Imanol Ibarbiak, pertika jauzian; Zuriñe Celisek, luzera-fosoan; eta Arinette Ngolek, jaurtiketan. Bestalde, Alai Cabellok, Lukas Cabezonek eta Naia Llorentek brontzezko dominak eskuratu zituzten, 800 metroetan, 3.000 metro oztopoetan eta altuera jauzian, hurrenez hurren.
Honekin, Super Amara BATek denboraldi autonomiko bikaina itxi du euskal aire zabaleko txapelketan.
Giro ona denboraldi amaierako festan
Larunbatean, hilak 6, 150 pertsona baino gehiago bildu ziren Plaiaundin denboraldi amaierako lehen jaia egiteko. Gazteek euren gurasoekin batera, giro bikainean izan ziren atletismo probetan lehiatzen. Gazteen eta haurren arteko pike ugari egon ziren, baina denak elkarrekin errelebo lasterketa bat egin zuten goizari amaiera emateko.
Lehiaketaren ondoren, bertaratutako guztien artean zozketa bat egin zuten klubeko jantziekin eta lau urdaiazpikorekin. Bazkaltzeko hanburgesa, barbakoa eta paella izan zuten, eta gozatzeko gogoak ekitaldia arrakastatsua izatea ahalbidetu zuen.
700 korrikalari baino gehiago Irungo 5K lasterketan
10. urtez jarraian, Irungo 5K milia lasterketa egin zuten igandean, hilak 7, Kolon pasealekuan. 09:30ean, Ttipi-Ttapa ibilbidea egin zuten 40 bat lagunek. Oinezko ibilbidearen ondoren, mokadutxoa izan zuten prest Zabaltza plazan.
10:00etan, 5K lasterketaren txanda izan zen. Lehen txandan, 20 minututik gorako aurreikusitako marken lasterketa izan zen. Gizonezkoetan, Mikel Hermoso, Lander Tapia eta Unai Blanco izan ziren lehenengo hiru sailkatuak; emakumezkoetan, berriz, Naiara Domeño, Sara Aguirre eta Leire Eizaguirre. 20 minutuz azpikoetan, Kevin Lassere izan zen lehenengoa, Pierre Urruty eta Enaitz Aginagalderen aurretik. Emakumezkoetan, Paula del Pozo izan zen azkarrena, Maria Velazquez eta Idoia Nogales, bigarren eta hirugarren izan ziren, hurrenez hurren.
Kirol jardunaldia borobiltzeko milia solidarioa adinaren arabera mailakatuta eta Gipuzkoako Minbiziaren Aurkako Elkartearen aldeko martxa solidarioa egin zuten. Kolon pasealekua korrikalariz beteta egon zen goiz osoan zehar, eta beste urte batez lasterketa honek duen garrantzia erakutsi zuten parte hartzaileek.
