Alamedan esku hartze handiago bat eskatu du PSEk
Aurreko astean, Olinpiaden festa zela eta, lurreko zuloak estali zituzten, baina sozialisten ustez, denbora motz baterako soluzioa da hori, eta "askoz gehiago behar du eremuak".
Urteak dira Alameda aparkaleku bat bezala erabiltzen dela. Leku historikoa izanik, ondarea autoen azpian gelditzen da. Larunbatean Olinpiaden azken egunerako erabili zen espazioa, eta beraz, azken urteetan egin den moduan, brigadak aparkalekuko zuloak tapatu zituen. Baina zulo horiek aste gutxietan berriro ateratzen dira. Hori bera salatu nahi izan du PSE udal taldeak, udaletxeari eskatuz Alamedan plan integral bat osatu dezan.
Sozialistek uste dute horrelako neurriak soilik denbora motz baterako direla, eta horregatik, beharrezkoa dela erabaki bat hartzea, bertan “erabilera desberdinen bizikidetza bermatzeko helburuarekin”. Lurra ez ezik, hiri altzariak zaintzea eta berritzea beharrezkoa da PSEren ustez, eta baita ere espazio publiko osoaren antolamendu zainduagoa edukitzea.
“Alameda Hondarribiko lekurik adierazgarri eta erabilienetako bat da. Paseatzeko eta elkarbizitzarako gune gisa balio izateaz gain, urtean zehar hainbat jai-, kulturaeta gizarte jarduera hartzen ditu, hala nola bazkari herrikoiak, kontzertuak, Baserri Eguna eta herritarren parte-hartze handiko beste ekitaldi batzuk “, nabarmendu du PSEk.
