Kalabaza zaporearekin agur esan diete aurtengo Olinpiadei
2026ko Hondarribiko Olinpiadak Amonan Txikhotia taldeak irabazi ditu; eta gaurko garailea Alaxka eta Baxka taldea izan da.
Amaitu dira aurtengo Hondarribiako Olinpiadak. Alameda gastronomia gune bilakatu da gaur goizean, bertan izan baitira aurtengo Olinpiadetako taldeak plater gozoak prestatzen. Sormena lantzeko proba izan da aurtengo edizioko azkena, eta su geldoan komitea harritzeko platerak prestatzen ahalegindu dira. Parte hartzaileen kopurua gora egin du, talde beteranoak ere gaurko probara batu egin baitira.
Talde bakoitzak bere platera egin du, betebehar bat zuten. Edozein prestatzen zutela ere, kalabaza plateraren protagonista izan behar zuen. Behin plater guztiak prestatuta eta komiteak dastatuta, probaren irabazlea Alaxka eta Baxka taldea izan dela erabaki dute.
2026ko Hondarribiko Olinpiaden irabazlea, berriz, Amonan Txikhotia taldea izan da. Hilabeteotan egindako probak kontuan hartuta, sailkapen orokorrean lehenengoak izan dira. Arratsalde luzea izango dute garaipena ospatzeko, baita herri giroan musikaz disfrutatzeko tartea ere. 17:00etan hasita, Xaukena elektrotxarangak kaleak alatuko ditu. Ondoren, Skarregekasko eta Dj Fresamorangoren txanda izango da, aurtengo Olinpiadek merezi duten agurra jasotzeko.
Jarraian, HITZAk gastronomia proban ateratako argazkiak:
