Bikingo Eguna egingo dute larunbatean
Itsasoa izango dute protagonista, eta era ezberdinetan disfrutatuko dute hartaz.
Urteak daramatza HS2 Surf elkarteak Bikingo Eguna antolatzen. Jada askorentzako erreferentziazko egun bat da, kirolaz gozatzeko eguna. Egun osoko programazioa prestatu dute, eta beti bezala, stand up paddle surfa (SUP) eta surfa izango dira protagonistak. Iñaki Navascues Triki da antolatzailea, eta gogo handiz hartzen du data. Kai Zaharrean eta Butroi pasealekuan pasako dute eguna.
Goizean, SUP Txapelketa egingo dute. “Itsasadarraren, hondartzaren eta itsaso zabalaren artean egiten den ibilbideak izaera berezia ematen dio lehiaketari, eta maila desberdinetara egokitutako kategoriak antolatzeko aukera eskaintzen du”, esan du Trikik. Helduek amateur eta elite mailan parte hartzeko aukera izango dute, baina txikienek ere izango dute haien txanda. Txiki SUP 14 urtera arteko gazteentzat egiten dute, eta zirkuitua Kai Zaharrean bertan egingo dute. SUPa gazteenei hurbiltzeko aukera ederra izaten da.
Dragon Boat ontzia hainbatetan ikusten da Bidasoko uretatik astean zehar. Bikingo Egunean ere bertan izango dira, 17:00etatik 20.00etara. Kirol honek Zaragoza, Getxo, Donostia eta Hondarribitik etorritako ehun parte-hartzaile baino gehiago bilduko ditu. “Dragon Boatean politena sortzen den giroa da. Adin eta profil askotako pertsonek hartzen dute parte kirol honetan, eta horietako askok ez dute aurretik itsasoarekin harreman esturik izan. Hemen, garrantzitsuena denok batera arraun egitea da”, adierazi du Trikik.
Itsasoaz haratago
Horrez gain, arratsaldean zehar hainbat kirol izango dira ikusgai, hala nola surf skatea, eta noski, beste egitasmo anitzak, hala nola, kartak, aurpegi pintaketa eta globofexia. Lupe Queiruga Kirol zinegotziak azpimarratu du Hondarribiko Udalak kirol-jarduera sustatzeaz gain, parte-hartzea, berdintasuna, inklusioa eta bizi-ohitura osasungarriak bultzatzen dituzten ekimenekiko konpromiso irmoa duela.
